ഓസ്ട്രേലിയയില് സ്ഥിരതാമസം അനുവദിക്കുന്ന റസിഡന്റ്സ് വിസ നേടി പ്രശസ്ത നര്ത്തകി മേതില് ദേവിക. ആഗോള തലത്തിലുള്ള പ്രവര്ത്തന മികവിനെ അടിസ്ഥാനമാക്കി ഗ്ലോബല് ടാലന്റ് വിഭാഗത്തിലാണ് ഓസ്ട്രേലിയന് ഗവണ്മെന്റ് മേതില് ദേവികയ്ക്ക് പെര്മനന്റ് റെസിഡന്റ് സ്റ്റാറ്റസ് അനുവദിച്ചത്. മേതില് ദേവികതന്നെയാണ് ഇക്കാര്യം സോഷ്യല് മീഡിയയിലൂടെ അറിയിച്ചത്.
ഓസ്ട്രേലിയയില് സ്ഥിരതാമസത്തിനുള്ള റെസിഡന്റ് സ്റ്റാറ്റസ് ലഭിച്ചതില് സന്തോഷമുണ്ടെന്ന് മേതില് ദേവിക പറഞ്ഞു. മികച്ച പ്രതിഭ വിഭാഗത്തിലാണ് നേടാന് ഏറെ ബുദ്ധിമുട്ടുള്ള വിസ ലഭിച്ചിരിക്കുന്നതെന്നും അവര് പറഞ്ഞു.
'ഗ്ലോബല് ടാലന്റ് വിഭാഗത്തില് ഓസ്ട്രേലിയന് ഗവണ്മെന്റ് എനിക്ക് പെര്മനന്റ് റെസിഡന്റ് സ്റ്റാറ്റസ് അനുവദിച്ച വിവരം നിങ്ങളെ അറിയിക്കുന്നതില് എനിക്ക് സന്തോഷമുണ്ട്. ആഗോളതലത്തില് ഒരാളുടെ പ്രവര്ത്തന മികവിനുള്ള അംഗീകാരമെന്ന നിലയില് മികച്ച പ്രതിഭ വിഭാഗത്തിലാണ് നേടാന് ഏറെ ബുദ്ധിമുട്ടുള്ള ഈ പ്രിവിലേജ്ഡ് വിസ എനിക്ക് അനുവദിച്ചിരിക്കുന്നത്. ഇപ്പോള് ഞാനും എന്റെ മകനും ഓസ്ട്രേലിയയിലെ സ്ഥിര താമസക്കാരാകാനുള്ള അര്ഹത നേടിയിരിക്കുകയാണ്.' മേതില് ദേവിക പോസ്റ്റ് ചെയ്തു.
അതേസമയം, വിഷ്ണു മോഹന് സംവിധാനം ചെയ്യുന്ന 'കഥ ഇന്നുവരെ' എന്ന ചിത്രത്തിലൂടെ മലയാള സിനിമയില് അരങ്ങേറ്റം കുറിച്ചിരിക്കുകയാണ് മേതില് ദേവിക. ബിജുമേനോന് നായകനാകുന്ന ചിത്രത്തില് നായികയാണ് അവര്. നിഖില വിമല്, അനുശ്രീ, അനു മോഹന്, ഹക്കിം ഷാജഹാന് എന്നിവരും പ്രധാന വേഷങ്ങളിലെത്തുന്നുണ്ട്. സെപ്റ്റംബര് 20 നാണ് ചിത്രം തിയേറ്ററുകളിലെത്തുക.
