മുഖ്യമന്ത്രി പിണറായി വിജയനുമായി കൂടിക്കാഴ്ച നടത്തി ഡബ്ല്യുസിസി അംഗങ്ങള്. ഹേമ കമ്മിറ്റി റിപ്പോര്ട്ടിലെ തുടര്നടപടികളും സിനിമാ നയത്തിലെ നിലപാടും അറിയിച്ചു. റിമാ കല്ലിങ്കല്, രേവതി, ദീദി ദാമോദരന്, ബീനാ പോള് തുടങ്ങിയവരാണ് മുഖ്യമന്ത്രിയെ കണ്ടത്. മുഖ്യമന്ത്രിയുടെ ഓഫീസിലായിരുന്നു കൂടിക്കാഴ്ച.
ഹേമ കമ്മിറ്റി റിപ്പോര്ട്ടിലെ തുടര് നടപടികള് കൂടിക്കാഴ്ചയില് ചര്ച്ചയായി. സിനിമ നയത്തിലെ ഡബ്ല്യുസിസി നിലപാട് മുഖ്യമന്ത്രിയെ അംഗങ്ങള് അറിയിച്ചു. ഹേമ കമ്മിറ്റിക്ക് മുന്പില് മൊഴി നല്കിയവരുടെ സ്വകാര്യത ഉറപ്പാക്കണം, എസ്ഐടി അന്വേഷണത്തിന്റെ പേരില് സ്വകര്യത ലംഘനം ഉണ്ടാവരുത്, വനിതകള്ക്ക് ലൊക്കേഷനില് സൗകര്യം ഉറപ്പാക്കണം, ഹേമ കമ്മിറ്റിയുടെ ശുപാര്ശകള് നടപ്പിലാക്കണം തുടങ്ങിയ ആവശ്യങ്ങളും ഡബ്ല്യുസിസി മുഖ്യമന്ത്രിയെ അറിയിച്ചു.
പ്രശ്നപരിഹാരമെന്ന ലക്ഷ്യമാണുള്ളതെന്നും സര്ക്കാരുമായി ചേര്ന്ന് എന്തു ചെയ്യാന് കഴിയുമെന്നാണ് ആലോചിക്കുന്നെന്നും കൂടിക്കാഴ്ചയ്ക്കു ശേഷം റിമാ കല്ലിങ്കല് പ്രതികരിച്ചു. ഹേമ കമ്മിറ്റി റിപ്പോര്ട്ട് പഠിക്കാന് അഞ്ജലി മേനോന്, പത്മപ്രിയ ഗീതു മോഹന്ദാസ് തുടങ്ങിയവരെ ഡബ്ല്യുസിസി ചുമതലപ്പെടുത്തിയിരുന്നു. ഇവര് രൂപപ്പെടുത്തിയ നിര്ദേശങ്ങളാണ് സര്ക്കാരിനു മുന്പില് ഇവര് സമര്പ്പിച്ചത്. ഡബ്ല്യുസിസിയുടെ ആവശ്യപ്രകാരമാണ് സിനിമാ മേഖലയിലെ സ്ത്രീകളുടെ പ്രശ്നങ്ങള് പഠിക്കാന് ജസ്റ്റിസ് ഹേമ കമ്മിറ്റിയെ സര്ക്കാര് നിയോഗിച്ചത്.
