മലയാള സിനിമയില് പുതിയ സംഘടന പ്രഖ്യാപിക്കാനൊരുങ്ങുന്നു. തൊഴിലാളികളുടെ ശാക്തീകരണം ലക്ഷ്യമിട്ട് പ്രോഗ്രസീവ് ഫിലിം മേക്കേഴ്സ് എന്ന പേരിലാണ് പുതിയ സംഘടന. അടുത്തിടെ ഫെഫ്കയില് നിന്ന് രാജി വച്ച ആഷിക് അബു അടക്കമാണ് പുതിയ സംഘടനയ്ക്ക് നേതൃത്വം വഹിക്കുന്നത്. പുത്തന് സിനിമ സംസ്കാരം രൂപീകരിക്കുമെന്നാണ് വാഗ്ദാനം.
സംവിധായകരായ ആഷിക്ക് അബു, അഞ്ജലി മേനോന്, ലിജോ ജോസ് പെല്ലിശ്ശേരി, രാജീവ് രവി, നടി റിമ കല്ലിങ്കല് തുടങ്ങിയവരുടെ നേതൃത്വത്തിലാണ് പുതിയ സംഘടന രൂപീകരിക്കുന്നതെന്നാണ് റിപ്പോര്ട്ടുകള്. നിലവില് സംഘടനയെ കുറിച്ചുളള വിവരങ്ങളടങ്ങിയ കത്ത് സിനിമ പ്രവര്ത്തകര്ക്ക് നല്കി തുടങ്ങിയിട്ടുണ്ട്.
തൊഴിലാളികളുടെ അവകാശം സംരക്ഷിക്കുമെന്നും, സമത്വം, സഹകരണം, സാമൂഹിക നീതി മൂല്യങ്ങളില് വേര് ഊന്നി പ്രവര്ത്തിക്കുമെന്നും കത്തില് പറയുന്നുണ്ട്. പിന്നണി പ്രവര്ത്തകര് എന്ന നിലയില് മുന്നോട്ട് ഇറങ്ങണമെന്നും കത്തിലുണ്ട്. അതേസമയം ഹേമ കമ്മിറ്റി റിപ്പോര്ട്ട് പുറത്ത് വന്നതിന് പിന്നാലെ അതിക്രമങ്ങള്ക്കെതിരെ ശക്തമായ നിലപാടുകള് സ്വീകരിച്ചവരാണ് പുതിയ സംഘടനയുടെ തലപ്പത്തെന്നതും ശ്രദ്ധേയമാണ്.
