മലയാള സിനിമയില് രൂപീകരിക്കാന് ആലോചിക്കുന്ന ചലച്ചിത്ര കൂട്ടായ്മയില് നിലവില് ഭാഗമല്ലെന്ന് സംവിധായകന് ലിജോ ജോസ് പെല്ലിശ്ശേരി. ക്രിയാത്മകമായ ചലച്ചിത്ര സംവിധായക നിര്മാതാക്കളുടെ സ്വതന്ത്ര കൂട്ടായ്മ എന്ന ആശയത്തോട് യോജിക്കുന്നു. പ്രചരിക്കുന്ന ഒന്നും എന്റെ അറിവോടെയല്ലെന്നും ലിജോ ജോസ് സമൂഹമാധ്യമക്കുറിപ്പില് വ്യക്തമാക്കി.
മാധ്യമങ്ങളില് പ്രചരിക്കുന്ന ചലച്ചിത്ര കൂട്ടായ്മയില് ഞാന് നിലവില് ഭാഗമല്ല. ക്രീയാത്മകമായ ചലച്ചിത്ര സംവിധായക നിര്മാതാക്കളുടെ സ്വതന്ത്ര കൂട്ടായ്മ എന്ന ആശയത്തോട് യോജിക്കുന്നു അത്തരത്തിലൊന്നിനെ സ്വാഗതം ചെയ്യുന്നു . അങ്ങിനെയൊരു കൂട്ടായ്മയുടെ ഭാഗമാവാന് ഞാന് ആഗ്രഹിക്കുന്ന പക്ഷം അതൊരു ഔദ്യോഗിക അറിയിപ്പായി എന്റെ ഭാഗത്തു നിന്നും ഉണ്ടാകും . അതുവരെ എന്റെ പേരില് പ്രചരിക്കുന്ന ഒന്നും എന്റെ അറിവോടെയല്ല ലിജോ കുറിച്ചു.
ഇതിനു പിന്നാലെ പുതിയ സിനിമാ കൂട്ടായ്മയില് ആശയക്കുഴപ്പമൊന്നും ഇല്ലെന്ന് സംവിധായകന് ആഷിഖ് അബു പറഞ്ഞു. സംഘടനയുമായി ബന്ധപ്പെട്ട ചര്ച്ചകള് തുടങ്ങിയിട്ടെ ഉള്ളൂവെന്നും സംശയങ്ങള് എല്ലാം പരിഹരിക്കുമെന്നും ആഷിഖ് അബു മാധ്യമങ്ങളോട് വ്യക്തമാക്കി.
തൊഴിലാളികളുടെ ശാക്തീകരണം ലക്ഷ്യമിട്ട് പ്രോഗ്രസീവ് ഫിലിം മേക്കേഴ്സ് എന്ന പേരിലാണ് പുതിയ സംഘടനയെന്നും അടുത്തിടെ ഫെഫ്കയില് നിന്ന് രാജി വച്ച ആഷിക് അബു അടക്കമാണ് പുതിയ സംഘടനയ്ക്ക് നേതൃത്വം വഹിക്കുന്നതെന്നുമുള്ള വാര്ത്തകള് വന്നിരുന്നു.
സംവിധായകരായ ആഷിഖ് അബു, അഞ്ജലി മേനോന്, ലിജോ ജോസ് പെല്ലിശേരി, രാജീവ് രവി, നടി റിമ കല്ലിങ്കല് തുടങ്ങിയവരുടെ നേതൃത്വത്തിലാണ് പുതിയ സംഘടന രൂപീകരിക്കുന്നതെന്ന റിപ്പോര്ട്ടുകളാണ് പുറത്ത് വന്നത്.
