തെറ്റായ കാര്യങ്ങള് പ്രചരിപ്പിച്ച് സോഷ്യല് മീഡിയയിലൂടെ അപകീര്ത്തിപ്പെടുത്തിയെന്ന് ആരോപിച്ച് പൊലീസില് പരാതി നല്കി നടി റിമ കല്ലിങ്കല്. വ്യക്തിഹത്യ ചെയ്യുന്നു, സല്പ്പേരിനെ ബാധിക്കുന്ന രീതിയില് തെറ്റായ കാര്യങ്ങള് പ്രചരിപ്പിക്കുന്നുവെന്ന് ആരോപിച്ചാണ് നടി കൊച്ചി സിറ്റി പൊലീസ് കമ്മീഷണര്ക്ക് പരാതി നല്കിയത്.
സോഷ്യല് മീഡിയയിലൂടെ പ്രതിഛായ മോശമാക്കുന്നതായും റിമയുടെ പരാതിയില് പറയുന്നുണ്ട്. ഇ മെയിലൂടെയാണ് പരാതി കൈമാറിയത്. അതേസമയം, നടിക്കെതിരെ ആരോപണങ്ങള് ഉന്നയിച്ച ഗായിക സുചിത്രയ്ക്കെതിരെയും റിമ കേസ് നല്കിയിട്ടുണ്ട്. മാനനഷ്ടത്തിനാണ് കേസ് നല്കിയത്.
റിമ കല്ലിങ്കിലിന്റെ കരിയര് തകര്ത്തത് ലഹരിയാണ് എന്നായിരുന്നു സുചിത്ര പറഞ്ഞത്. പാര്ട്ടികളില് മയക്കുമരുന്ന് ഒഴുകുകയാണ്. സ്ത്രീകളും പുരുഷന്മാരും ഈ പാര്ട്ടികളില് ലഹരി വസ്തുക്കള് ഉപയോഗിച്ചിട്ടുണ്ട്. പാര്ട്ടികളില് ഉപയോഗിക്കാന് പാടില്ലാത്ത വസ്തുക്കളാണ് ഇവര് ഉപയോഗിക്കുന്നത്.
കൊച്ചിയില് റെയ്ഡുകള് നടന്നത് റിമ കല്ലിങ്കലിനും ആഷിഖ് അബുവിനും എതിരെയല്ലേ എന്നും അവര് ചോദിച്ചു. ലഹരി ഒരിക്കല് പോലും ഉപയോഗിക്കാത്ത ഒരുപാട് പാവം പെണ്കുട്ടികള്ക്ക് ലഹരി ആദ്യം നല്കിയത് റിമ കല്ലിങ്കലാണ്. റിമയുടെ വീട്ടില് നടന്ന പാര്ട്ടികളില് പെണ്കുട്ടികള് ലൈംഗികമായി ദുരുപയോഗം ചെയ്യപ്പെട്ടിട്ടുണ്ടെന്നും സുചിത്ര പറഞ്ഞിരുന്നു.
