യു.കെ.വാര്‍ത്തകള്‍

മാറുന്ന കാലത്തു കാന്‍സര്‍ കേസുകള്‍ ലോകമെങ്ങും കൂടിവരുകയാണ്. യുകെയിലും വലിയ കുതിപ്പാണ് ഉണ്ടായിരിക്കുന്നത്. സമീപകാലത്തു നിരവധി യുകെ മലയാളികളാണ് കാന്‍സറിന്‌ ഇരയായി മരണപ്പെട്ടത്.

ഇംഗ്ലണ്ടില്‍ റെക്കോര്‍ഡ് തോതിലാണ് കാന്‍സര്‍ കേസുകള്‍ സ്ഥിരീകരിക്കുന്നതെന്ന് എന്‍എച്ച്എസ് കണക്കുകള്‍ വ്യക്തമാക്കുന്നു. പ്രതിദിനം ആയിരം പേര്‍ക്കെങ്കിലും രോഗം സ്ഥിരീകരിക്കുന്നുണ്ടെന്ന് കണക്കുകള്‍ സ്ഥിരീകരിക്കുന്നു.

2022-ല്‍ ഇംഗ്ലണ്ടില്‍ 346,217 കേസുകളാണ് സ്ഥിരീകരിച്ചത്. 2021-നെ അപേക്ഷിച്ച് 5 ശതമാനം വര്‍ദ്ധന. പ്രോസ്‌റ്റേറ്റ് കാന്‍സര്‍ കണ്ടെത്തുന്നതിന്റെ എണ്ണം ഉയര്‍ന്നതാണ് വര്‍ദ്ധനയ്ക്ക് വലിയ തോതില്‍ കാരണമാകുന്നത്. പ്രോസ്‌റ്റേറ്റ് കാന്‍സര്‍ ബാധ കാല്‍ശതമാനം വര്‍ദ്ധിച്ച് 54,732-ല്‍ എത്തിയത് ആകെ എണ്ണത്തില്‍ വലിയ സംഭാവന നല്‍കുന്നു.

2022-ലൈ കണക്കുകള്‍ പ്രകാരം ആകെ കാന്‍സര്‍ കേസുകള്‍ സ്ഥിരീകരിച്ചതില്‍ പുരുഷന്‍മാരുടെ രോഗത്തില്‍ 7 ശതമാനം വര്‍ദ്ധനവ് ഉണ്ടായിട്ടുള്ളതായി കാന്‍സര്‍ രജിസ്‌ട്രേഷന്‍ സ്റ്റാറ്റിസ്റ്റിക്‌സ് വ്യക്തമാക്കി. 180,877 പുരുഷന്‍മാര്‍ക്കാണ് കാന്‍സര്‍ ബാധിച്ചത്. സ്ത്രീകളില്‍ 2 ശതമാനമാണ് വര്‍ദ്ധന.

പ്രോസ്‌റ്റേറ്റ് കാന്‍സറാണ് 2022-ല്‍ ഏറ്റവും കൂടുതല്‍ കണ്ടെത്തിയ കാന്‍സര്‍. അതേസമയം 51 ശതമാനം പുതിയ കേസുകളും സ്തനം, ശ്വാസകോശം, കുടല്‍ കാന്‍സറുകളാണ്. കോവിഡ് കാലത്ത് ആളുകള്‍ പരിശോധന വൈകിച്ചതിനെ തുടര്‍ന്നുണ്ടായ വ്യത്യാസമാകാം ഈ വര്‍ദ്ധനവിന് പിന്നിലെന്ന് എന്‍എച്ച്എസ് ഇംഗ്ലണ്ട് പ്രതികരിച്ചു.

എന്‍എച്ച്എസിലെ വെയിറ്റിങ് ലിസ്റ്റിലെ നീളം കാന്‍സര്‍ ചികിത്സ ലഭ്യമാക്കുന്നതില്‍ കാലതാമസം ഉണ്ടാക്കുന്നുണ്ട്.