റിലീസിനൊരുങ്ങുന്ന മലയാള സിനിമകളില് എമ്പുരാനോളം കാത്തിരിപ്പ് ഉയര്ത്തിയ മറ്റൊരു ചിത്രമില്ല. സ്കെയിലിലും കാന്വാസിലും മലയാള സിനിമയെ അത്ഭുതപ്പെടുത്തുമെന്ന് പ്രതീക്ഷിക്കപ്പെടുന്ന എമ്പുരാന് വമ്പന് വിജയം നേടിയ ലൂസിഫറിന്റെ തുടര്ച്ചയാണ്. ഇപ്പോഴിതാ ആരാധകരെ ആവേശത്തിലാക്കി ചിത്രത്തിന്റെ റിലീസ് പ്രഖ്യാപിച്ചിരിക്കുകയാണ്.
2025 മാര്ച്ച് 27 ന് ചിത്രം ലോകവ്യാപകമായി തിയറ്ററുകളില് എത്തും. മലയാളത്തിന് പുറമെ തമിഴ്, തെലുങ്ക്, കന്നഡ, ഹിന്ദി ഭാഷകളിലും ചിത്രം എത്തും. കൗതുകമുണര്ത്തുന്ന ഒരു പോസ്റ്ററിനൊപ്പമാണ് റിലീസ് തീയതി പ്രഖ്യാപിച്ചിരിക്കുന്നത്. ആശിര്വാദ് സിനിമാസും ലൈക പ്രൊഡക്ഷന്സും സംയുക്തമായാകും എമ്പുരാന് നിര്മിക്കുക. 2019 ല് പുറത്തെത്തിയ ലൂസിഫറിന്റെ വിജയാഘോഷ വേളയില് പ്രഖ്യാപിക്കപ്പെട്ടിരുന്ന ചിത്രത്തെ ഇത്രയും നീട്ടിയത് കൊവിഡ് സാഹചര്യമായിരുന്നു.
ഇരുപതോളം വിദേശ രാജ്യങ്ങളിലാണ് സിനിമ ചിത്രീകരിച്ചിരിക്കുന്നതെന്നാണ് വിവരം. യുകെ, യുഎസ് എന്നിവിടങ്ങള്ക്കൊപ്പം റഷ്യയും ചിത്രത്തിന്റെ ഒരു പ്രധാന ലൊക്കേഷനാണ്. മോഹന്ലാലിനൊപ്പം ലൂസിഫറിലെ അഭിനേതാക്കളായ പൃഥ്വിരാജ്, ടൊവിനോ തോമസ്, മഞ്ജു വാര്യര്, ശശി കപൂര്, ഇന്ദ്രജിത്ത്, ബൈജു സന്തോഷ്, സാനിയ ഇയ്യപ്പന്, തുടങ്ങിയവരും ഈ ചിത്രത്തില് ശക്തമായ സാന്നിധ്യങ്ങളാണ്.
