ഡബ്ലിന്: അയര്ലന്ഡ് പാര്ലമെന്റ് തിരഞ്ഞെടുപ്പില് മലയാളി നഴ്സിനെ സ്ഥാനാര്ഥിയായി പ്രഖ്യാപിച്ച് ഫിനഫാള് പാര്ട്ടി. കോട്ടയം പാലാ സ്വദേശിനിയും ഡബ്ലിന് മാറ്റര് മെസകോഡി യൂണിവേഴ്സിറ്റി ഹോസ്പിറ്റലിലെ നഴ്സുമായ മഞ്ജു ദേവിയാണ് ഭരണകക്ഷിയായ ഫിനഫാൾ ഔദ്യോഗിക സ്ഥാനാര്ഥിയായി പ്രഖ്യാപിച്ചത്. അയര്ലന്ഡ് ചരിത്രത്തില് ആദ്യമായാണ് ഒരു മലയാളി പാര്ലമെന്റിലേക്ക് ഔദ്യോഗിക സ്ഥാനാര്ഥിയാകുന്നത്.
ഡബ്ലിന് ഫിംഗാല് ഈസ്റ്റ് മണ്ഡലത്തിലാണ് മഞ്ജു മത്സരിക്കുന്നത്. നിലവിലെ അയര്ലന്ഡ് മന്ത്രിസഭയിലെ ഭവന, തദ്ദേശ വകുപ്പ് മന്ത്രി ഡാരാ ഓ’ ബ്രീന് ഒപ്പം രണ്ടാം സ്ഥാനാര്ഥിയായാണ് മഞ്ജു മത്സരിക്കുക. ഔദ്യോഗികമായി തീയതി പ്രഖ്യാപനം ഉണ്ടായിട്ടില്ലെങ്കിലും ഡിസംബര് ആദ്യവാരത്തില് തിരഞ്ഞെടുപ്പ് ഉണ്ടാകും എന്നാണ് പുറത്തു വരുന്ന സൂചനകള്.
തിരുവനന്തപുരം പൂജപ്പുര സ്വദേശിയും അയര്ലന്ഡിലെ പ്രമുഖ ക്രിക്കറ്റ് ക്ലബ് ആയ ഫിംഗ്ലാസ് ക്രിക്കറ്റ് ക്ലബിന്റെ സ്ഥാപകരില് ഒരാളുമായ ശ്യാം മോഹനാണ് മഞ്ജു ദേവിയുടെ ഭര്ത്താവ്. അയര്ലന്ഡ് അണ്ടര് 15 ക്രിക്കറ്റ് ടീമിന് വേണ്ടി മത്സരിച്ചിട്ടുള്ള ദിയ ശ്യം, ടെക്സാക്കോ ചില്ഡ്രന്സ് ആര്ട്ട് മത്സരത്തില് വിജയിയായ ശ്രേയ ശ്യം എന്നിവരാണ് മക്കള്. ഇന്ത്യയിലെ ആദ്യകാല കരസേന അംഗങ്ങളില് ഒരാളും പരേതനുമായ ഹവില്ദാര് മേജര് കെ എം ബി ആചാരിയാണ് മഞ്ജുവിന്റെ പിതാവ്.
പാലാ സെന്റ് മേരീസ് സ്കൂള്, അല്ഫോന്സാ കോളേജ് എന്നിവിടങ്ങളിലെ പഠനത്തിന് ശേഷം മഞ്ജു രാജസ്ഥാനിലെ പിലാനി ബിര്ളാ സ്കൂള് ഓഫ് നഴ്സിങില് നിന്നും ഒന്നാം റാങ്കോടെയാണ് ജനറല് നഴ്സിങ് പാസായത്. അവിടെ സ്റ്റുഡന്റ് നഴ്സസ് അസോസിയേഷന് സെക്രട്ടറിയായി പ്രവര്ത്തിച്ചിരുന്നു.
ഡല്ഹി ഫോര്ട്ടിസ് എസ്കോര്ട്സ് ഹാര്ട്ട് ഇന്സ്റ്റിറ്റ്യൂട്ട്, സൗദി കിങ് ഫൈസല് ഹോസ്പിറ്റല് എന്നിവിടങ്ങളില് സേവനം അനുഷ്ഠിച്ചിട്ടുണ്ട്. തുടര്ന്ന് 2005 ലാണ് മഞ്ജുവും കുടുംബവും അയര്ലന്ഡില് എത്തുന്നത്. 2016 ല് ഡബ്ലിന് ആര്സിഎസ്ഐയില് നിന്നും നഴ്സിങ് ബിരുദം നേടി. 2022 ല് ഹ്യൂമന് സൈക്കോളജിയില് ലെവല് 5 കോഴ്സും പാസായി.
