നിര്മാതാവ് സാന്ദ്രാ തോമസിനെ പ്രൊഡ്യൂസേഴ്സ് അസോസിയേഷനില് നിന്ന് പുറത്താക്കി
തിരുവനന്തപുരം: പ്രമുഖ നിര്മാതാവും അഭിനേത്രിയുമായ സാന്ദ്രാ തോമസിനെ പ്രൊഡ്യൂസേഴ്സ് അസോസിയേഷനില് നിന്ന് പുറത്താക്കി. അച്ചടക്കം ലംഘിച്ചു എന്ന് കാണിച്ചാണ് നടപടി. സിനിമാവിതരണവുമായി ബന്ധപ്പെട്ട ഒരു യോഗത്തില് വിളിച്ചുവരുത്തി അസോസിയേഷനിലെ ഭാരവാഹികള് തന്നെ അപമാനിച്ചു എന്ന് സാന്ദ്ര പരാതി നല്കിയിരുന്നു. ഇതിന് പിന്നാലെയാണ് നടപടി.
നേരത്തേ പ്രൊഡ്യൂസേഴ്സ് അസോസിയേഷനെതിരേ സാന്ദ്ര കടുത്ത വിമര്ശനം ഉന്നയിച്ചിരുന്നു. ഒന്നോ രണ്ടോ വ്യക്തികളുടെ തീരുമാനപ്രകാരം മാത്രമാണ് സംഘടന പ്രവര്ത്തിക്കുന്നതെന്നും മറ്റുള്ളവരെ ഒന്നും അറിയിക്കുന്നില്ലെന്നുമാണ് സാന്ദ്രാ തോമസ് പ്രതികരിച്ചത്. വനിതാ നിര്മാതാക്കള് നേരിടുന്ന പ്രതിസന്ധികളെക്കുറിച്ചുള്ള ചര്ച്ചകള് പ്രഹസനമാണെന്നും സംഘടനയുടെ നേതൃത്വം മാറണമെന്നും ആവശ്യപ്പെട്ട് സാന്ദ്ര തോമസും ഷീല കുര്യനും കത്തയക്കുകയുണ്ടായി.
ഹേമാ കമ്മിറ്റി റിപ്പോര്ട്ടിന്റെ സാഹചര്യത്തില് സിനിമാ രംഗത്തെ വനിതാ നിര്മാതാക്കര് കടന്നു പോകുന്ന പ്രശ്നങ്ങളെക്കുറിച്ചുള്ള ചര്ച്ചയില് ഒരു യോഗം വിളിച്ചിരുന്നു. അതൊരു പ്രഹസനമായിരുന്നുവെന്നാണ് കത്തില് പറഞ്ഞത്. ഹേമാ കമ്മിറ്റി റിപ്പോര്ട്ടിന് പിന്നാലെ പ്രൊഡ്യൂസേഴ്സ് അസോസിയേഷന് നല്കിയ കത്തിന്റെ ഉള്ളടക്കത്തെക്കുറിച്ച് ചോദിച്ചപ്പോര് സംഘടന വ്യക്തമായ ഉത്തരം നല്കിയില്ലെന്നും കത്തില് പറഞ്ഞിരുന്നു.
