യുകെ സമ്പദ് വ്യവസ്ഥയെ തകര്ത്തത് ബ്രക്സിറ്റെന്ന് ബാങ്ക് ഓഫ് ഇംഗ്ലണ്ട് ഗവര്ണര്
ബ്രക്സിറ്റിനെതിരെ കടുത്ത വിമര്ശനവുമായി ബാങ്ക് ഓഫ് ഇംഗ്ലണ്ട് ഗവര്ണര് രംഗത്ത് . യുകെയുടെ സമ്പദ് വ്യവസ്ഥയെ തുരങ്കം വെയ്ക്കുന്നതില് ബ്രക്സിറ്റ് മുഖ്യ പങ്കു വഹിച്ചതായി ബാങ്ക് ഓഫ് ഇംഗ്ലണ്ട് ഗവര്ണര് ആന്ഡ്രൂ ബെയ്ലി പറഞ്ഞു. ഈ പ്രസ്താവന വരും ദിവസങ്ങളില് വന് ചര്ച്ചകള്ക്ക് വഴിവെക്കുമെന്നാണ് രാഷ്ട്രീയ സാമ്പത്തിക വിദഗ്ധര് കരുതുന്നത്. ബ്രിട്ടന് ഇനിയും യൂറോപ്യന് യൂണിയനുമായുള്ള ബന്ധം പുനര് നിര്മ്മിക്കാന് പരിശ്രമിക്കണമെന്ന് ആന്ഡ്രൂ ബെയ്ലി സര്ക്കാരിനോട് ആവശ്യപ്പെട്ടു.
വ്യാഴാഴ്ച വൈകുന്നേരം ലണ്ടന് നഗരത്തിലെ മാന്ഷന് ഹൗസ് ഡിന്നറില് സംസാരിക്കുമ്പോഴാണ് ആന്ഡ്രൂ ബെയ്ലി ബ്രക്സിറ്റിനെ പരാമര്ശിച്ചത് . എന്നാല് ബ്രക്സിറ്റിനെ കുറിച്ച് തനിക്ക് ഒരു മുന് നിലപാടും ഇല്ലെന്ന് അദ്ദേഹം പറഞ്ഞു. പക്ഷേ ബാങ്ക് ഓഫ് ഇംഗ്ലണ്ടിന്റെ ഗവര്ണര് എന്ന നിലയില് ബ്രക്സിറ്റിനെ തുടര്ന്ന് രാജ്യം അഭിമുഖീകരിക്കുന്ന സാമ്പത്തിക സ്ഥിതിയെ കുറിച്ച് പറയാന് തനിക്ക് ബാധ്യതയുണ്ടെന്ന് അദ്ദേഹം വ്യക്തമാക്കി. ബ്രിട്ടീഷ് ജനതയുടെ ബ്രക്സിറ്റിനായുള്ള തീരുമാനത്തെ താന് മാനിക്കുന്നതായും എന്നാല് ബന്ധങ്ങള് വേര്പ്പെടുത്തുന്നതിനും പുനര് നിര്മ്മിക്കുന്നതിനും നമ്മള് ജാഗ്രത പാലിക്കണമെന്നും ആന്ഡ്രൂ ബെയ്ലി അഭിപ്രായപ്പെട്ടു.
ബാങ്ക് ഓഫ് ഇംഗ്ലണ്ടിന്റെ ഗവര്ണര് സാധാരണഗതിയില് തര്ക്കമുളവാക്കുന്ന രാഷ്ട്രീയ വിഷയങ്ങളില് അഭിപ്രായ പ്രകടനങ്ങള് നടത്താറില്ല. എന്നിരുന്നാലും ബെയ്ലിയുടെ മുന്ഗാമിയായ മാര്ക്ക് കാര്ണി 2016 ലെ റഫറണ്ടത്തിന് മുമ്പ് ബ്രക്സിറ്റിന്റെ സാമ്പത്തിക പ്രത്യാഘാതങ്ങളെ കുറിച്ച് മുന്നറിയിപ്പ് നല്കിയിരുന്നു. ബെയ്ലി നിലവില് ഉയര്ത്തുന്ന അഭിപ്രായങ്ങള് മുന് ഗവര്ണറുടെ വാദങ്ങളെ ശരി വയ്ക്കുന്നതാണ്. എല്ലാ ഇറക്കുമതികള്ക്കും 10% സാര്വത്രിക താരിഫ് എന്ന തന്റെ പദ്ധതിയുമായി ട്രംപ് മുന്നോട്ട് പോയാല് അത് അടുത്ത വര്ഷം യുകെയുടെ വളര്ച്ചാ നിരക്ക് 0.4% ആയി കുറയ്ക്കുമെന്ന് നാഷണല് ഇന്സ്റ്റിറ്റ്യൂട്ട് ഓഫ് ഇക്കണോമിക് ആന്ഡ് സോഷ്യല് റിസര്ച്ചിലെ വിദഗ്ധര് മുന്നറിയിപ്പ് നല്കി.
യുഎസിന്റെ പുതിയ നിലപാട് യുകെയുടെ സമ്പത്ത് രംഗത്തെ വളര്ച്ചയെ പിന്നോട്ടടിക്കുമെന്നാണ് സാമ്പത്തിക വിദഗ്ധര് ചൂണ്ടി കാണിക്കുന്നത്. ഇതു കൂടെ പരിഗണിച്ചാണ് യൂറോപ്യന് യൂണിയനും ആയിട്ടുള്ള ബന്ധം മെച്ചപ്പെടുത്തണമെന്ന് സാമ്പത്തിക വിദഗ്ധര് അഭിപ്രായപ്പെടുന്നത്.
ബ്രക്സിറ്റ് രാഷ്ട്രീയ വിഷയം ആയി മാത്രം കണ്ട പാര്ട്ടികളാണ് പ്രശ്നം വഷളാക്കിയത്.
