ഹിമാലയം പോലെ ഉയര്ന്ന എന്എച്ച്എസ് വെയ്റ്റിംഗ് ലിസ്റ്റ് എത്രയും പെട്ടെന്ന് കുറക്കാന് അന്ത്യശാസനവുമായി പ്രധാനമന്ത്രി കീര് സ്റ്റാര്മര്. 92% ഓപ്പറേഷനുകളും, അപ്പോയിന്റ്മെന്റുകളും 18 ആഴ്ചയ്ക്കുള്ളില് നടത്തണമെന്നാണ് പ്രധാനമന്ത്രിയുടെ നിര്ദ്ദേശം. എന്നാല് ഇതെങ്ങനെ നടപ്പാക്കുമെന്ന ചോദ്യമാണ് എന്എച്ച്എസ് മേധാവികള് ഉയര്ത്തുന്നത്
2029 മാര്ച്ച് മാസത്തോടെ ഈ ലക്ഷ്യം കൈവരിക്കണമെന്നാണ് പ്രധാനമന്ത്രിയുടെ നിര്ദ്ദേശം വരിക. വെയ്റ്റിംഗ് സമയം കുറയ്ക്കാനായി അടുത്ത രണ്ട് വര്ഷത്തില് 22 ബില്ല്യണ് പൗണ്ട് അധികമായി എന്എച്ച്എസിന് നല്കുമെന്നാണ് ഒക്ടോബര് ബജറ്റില് ചാന്സലര് റേച്ചല് റീവ്സ് പ്രഖ്യാപിച്ചത്. എന്എച്ച്എസിലെ വാഗ്ദാനങ്ങള് എ&ഇ, കമ്മ്യൂണിറ്റി കെയര്, മെന്റല് ഹെല്ത്ത് സര്വ്വീസ് ഉള്പ്പെടെ മറ്റ് മേഖലകളില് ബജറ്റ് കുറയ്ക്കാന് ഇടയാക്കുമെന്നാണ് ആരോഗ്യ മേധാവികള് ഭയക്കുന്നതെന്ന് ടൈംസ് റിപ്പോര്ട്ട് ചെയ്യുന്നു.
2029 ആകുന്നതോടെ വെയ്റ്റിംഗ് സമയം കുറയ്ക്കാനുള്ള ലക്ഷ്യം കൈവരിക്കാന് കഴിയുമെന്ന് ഭൂരിപക്ഷം എന്എച്ച്എസ് ട്രസ്റ്റ് മേധാവികളും കരുതുന്നില്ല. എന്എച്ച്എസ് പ്രൊവൈഡേഴ്സ് നടത്തിയ സര്വ്വെയില് 71% മേധാവികളും ഇത്തരമൊരു മുന്നേറ്റം സാധ്യമാണെന്ന് വിശ്വസിക്കുന്നില്ലെന്ന് വ്യക്തമാക്കി. അക്യൂട്ട്, ആംബലന്സ് ട്രസ്റ്റുകളില് ഈ ചിന്താഗതി 100% ആണെന്നതും പ്രശ്നമാണ്.
