ചില സീരിയലുകള് എന്ഡോസള്ഫാനേക്കാള് വിഷലിപ്തം എന്ന കേരള ചലച്ചിത്ര അക്കാദമി വൈസ് ചെയര്മാന് പ്രേംകുമാറിന്റെ പരാമര്ശം പിന്വലിക്കണമെന്ന് ആവശ്യപ്പെട്ട് മന്ത്രി ഗണേഷ് കുമാറും സീരിയല് താരങ്ങളുടെ സംഘടനയായ 'ആത്മ'യും. പരാമര്ശം പിന്വലിക്കണമെന്നും സീരിയല് മേഖലക്കായി പ്രേംകുമാര് എന്ത് ചെയ്തുവെന്നാണ് കുറ്റപ്പെടുത്തല്. ചില സീരിയലുകള് എന്ഡോസള്ഫാന് പോലെ മാരകമാണെന്നായിരുന്നു പ്രേംകുമാറിന്റെ പ്രതികരണം. സീരിയലുകള്ക്ക് സെന്സറിങ്ങ് വേണമെന്നും പ്രേംകുമാര് ആവശ്യപ്പട്ടിരുന്നു. കൊച്ചിയില് മാധ്യമങ്ങളോട് സംസാരിക്കവേ സീരിയിലുകളുമായി ബന്ധപ്പെട്ട് നടത്തിയ പരാമര്ശമാണ് വിവാദമായത്.
സിനിമയും സീരിയലും വെബ്സീരീസുമെല്ലാം ഒരു വലിയ ജനസമൂഹത്തെയാണ് കൈകാര്യം ചെയ്യുന്നത്. അത് പാളിപ്പോയാല് ഒരു ജനതയെ തന്നെ അപചയത്തിലേക്ക് നയിക്കുമെന്ന തിരിച്ചറിവ് കല സൃഷ്ടിക്കുന്നവര്ക്ക് ഉണ്ടാകണം. എല്ലാ സീരിയലുകളെയും അടച്ചാക്ഷേപിക്കുകയല്ല. 'കലാകാരന് അതിരുകളില്ലാത്ത ആവിഷ്കാരസ്വാതന്ത്ര്യം വേണമെന്ന് ആഗ്രഹിക്കുന്ന ആളാണ് ഞാന്. സിനിമയില് സെന്സറിങ് ഉണ്ട്.
എന്നാല്, ടെലിവിഷന് സീരിയലുകള്ക്കില്ല. അതില് ചില പ്രായോഗിക പ്രശ്നങ്ങളുണ്ട്. അന്നന്ന് ഷൂട്ട് ചെയ്യുന്നത് അതേ ദിവസം തന്നെ കാണിക്കുകയാണെന്നാണ് ഈ രംഗത്തുള്ളവര് പറയുന്നത്. അതിനിടെ സെന്സറിങ്ങിന് സമയമില്ല. ടെലിവിഷന് സീരിയലുകള് കുടുംബ സദസ്സുകളിലേക്കാണ് എത്തുന്നത്. ഈ ദൃശ്യങ്ങളുടെ ശീലത്തില് വളരുന്ന കുട്ടികള് ഇതാണ് ജീവിതം, ഇങ്ങനെയാണ് മനുഷ്യബന്ധങ്ങള് എന്നൊക്കെയാകും കരുതുക. അങ്ങനെയൊരു കാഴ്ചപ്പാട് ഉണ്ടാകുന്ന തലമുറയെ കുറിച്ചുള്ള ആശങ്കയാണ് ഞാന് പങ്കുവെക്കുന്നത്. കല കൈകാര്യം ചെയ്യുന്നവര്ക്ക് ആ ഉത്തരവാദിത്തം വേണം എന്നായിരുന്നു പ്രേം കുമാറിന്റെ പ്രതികരണം. ഇതിനു വലിയ സ്വീകാര്യതയാണ് സമൂഹ മാധ്യമങ്ങളില് ലഭിച്ചത്. വനിതാ കമ്മീഷനും ഇതേ നിലപാടായിരുന്നു സ്വീകരിച്ചത്. എന്നാല് സീരിയല്-സിനിമ രംഗത്തുള്ളവര് ഇതിനെതിരെ പ്രതികരണവുമായി എത്തിയിരുന്നു.
