ഇംഗ്ലണ്ടില് നായയുടെ ആക്രമണത്തില് ഒരാള് കൂടി കൊല്ലപ്പെട്ടു. ബുധനാഴ്ച രാവിലെ ഈസ്റ്റ് ലണ്ടനില് ആണ് നായയുടെ ആക്രമണത്തില് 42 വയസ്സുകാരനായ ഒരാള് ദാരുണമായി കൊല്ലപ്പെട്ടത്. സ്ട്രാറ്റ്ഫോര്ഡിലെ ഷെര്ലി റോഡില് നടന്ന സംഭവത്തില് പോലീസ് ഒരാളെ അറസ്റ്റ് ചെയ്തിട്ടുണ്ട്. 32 കാരിയായ ലെയ്നെ മക്ഡൊണലിനെയാണ് പോലീസ് അറസ്റ്റ് ചെയ്തത്. ആക്രമണം നടത്തിയ നായയുടെ ഉടമസ്ഥയാണ് ഇവര് എന്നാണ് പുറത്തു വരുന്ന വിവരങ്ങള്.
നായയുടെ ആക്രമണത്തില് ഒരാള്ക്ക് ഗുരുതരമായി പരിക്കേറ്റിട്ടുണ്ടെന്ന് അറിയിച്ചതിനെ തുടര്ന്ന് പോലീസിനെ സംഭവസ്ഥലത്തേക്ക് വിളിച്ചിരുന്നു. പരുക്കേറ്റയാളെ ആശുപത്രിയില് എത്തിച്ചെങ്കിലും പിന്നീട് മരണത്തിന് കീഴടങ്ങിയതായി മെട്രോപൊളിറ്റന് പോലീസ് അറിയിച്ചു. അപകടകരമായ രീതിയില് നായയെ സ്വതന്ത്രമാക്കി വിട്ടതിനാണ് ലെയ്നെ മക്ഡൊണലിന്റെ മേല് കുറ്റം ചുമത്തിയിരിക്കുന്നത്.
നവംബര് 18 -ന് നടന്ന മറ്റൊരു സംഭവത്തില് അപകടകരമായ രീതിയില് നായയെ അഴിച്ചു വിട്ടതിന് അവരുടെമേല് മറ്റൊരു കുറ്റവും ചുമത്തിയിട്ടുണ്ട്. രണ്ട് സംഭവങ്ങളിലും ഉള്പ്പെട്ട നായയെ പോലീസ് പിടികൂടിയതായി സേന സ്ഥിരീകരിച്ചു. റിമാന്ഡ് ചെയ്ത മക്ഡൊണലിനെ വെള്ളിയാഴ്ച ബാര്ക്കിംഗ്സൈഡ് മജിസ്ട്രേറ്റ് കോടതിയില് ഹാജരാക്കും.
