ആന്ധ്രാപ്രദേശിലെ തിയറ്ററില് പുഷ്പ 2 കാണാനെത്തിയ യുവാവിനെ മരിച്ച നിലയില് കണ്ടെത്തി. 35 കാരനായ ഹരിജന മദന്നപ്പയാണ് മരിച്ചത്. തിയറ്റര് വൃത്തിയാക്കാന് എത്തിയ ശുചീകരണ തൊഴിലാളികളാണ് യുവാവിനെ മരിച്ച നിലയില് കണ്ടെത്തിയത്. അതേസമയം സംഭവത്തില് ഭാരതീയ ന്യായ സംഹിത ആക്ട് 194 പ്രകാരം പൊലീസ് കേസെടുത്തു.
അനന്തപൂരിലെ രായദുര്ഗയിലുള്ള തീയറ്ററിലാണ് സംഭവം. ഷോയ്ക്ക് പിന്നാലെ തിയറ്ററിനുള്ഭാഗം വൃത്തിയാക്കാന് എത്തിയ ശുചീകരണ തൊഴിലാളികളാണ് യുവാവിനെ മരിച്ച നിലയില് കണ്ടെത്തിയത്. തുടര്ന്ന് പൊലീസിനെ വിവരം അറിയിക്കുകയായിരുന്നു. തുടര്ന്ന് പൊലീസ് എത്തി മറ്റ് നടപടികളിലേക്ക് കടന്നു.
ഇന്നലെ വൈകീട്ട് ആറ് മണിയോടെയാണ് യുവാവിനെ മരിച്ച നിലയില് കണ്ടെത്തിയതെന്ന് കല്യാണ്ദുര്ഗം ഡിഎസ്പി രവി ബാബു പറഞ്ഞു. ഉച്ചയ്ക്ക് 2.30 ഓടെയാണ് യുവാവ് തിയറ്ററില് എത്തിയത്. എപ്പോഴാണ് മരണം സംഭവിച്ചതെന്ന് വ്യക്തമല്ല. മദ്യപിച്ചായിരുന്നു ഇയാള് തിയറ്ററിനുള്ളില് പ്രവേശിച്ചതെന്നും അന്വേഷണത്തില് യുവാവ് മദ്യത്തിന് അടിമയാണെന്ന് വ്യക്തമായെന്നും ഡിഎസ്പി അറിയിച്ചു.
നേരത്തെ സിനിമയുടെ പ്രീമിയര് ഷോയുടെ തിരക്കില്പെട്ട് രേവതി എന്ന സ്ത്രീ മരിച്ചിരുന്നു.
