വിന്റര് സീസണിലേക്ക് പ്രവേശിച്ചതോടെ ആശുപത്രികളിലെത്തുന്ന രോഗികളുടെ എണ്ണത്തില് കുതിച്ചുചാട്ടം. വെറും ഏഴ് ദിവസം കൊണ്ട് ആശുപത്രിയിലെത്തുന്ന കേസുകളുടെ എണ്ണത്തില് 70% വര്ദ്ധനവാണ് നേരിട്ടതെന്ന് എന്എച്ച്എസ് വ്യക്തമാക്കി.
കഴിഞ്ഞ ആഴ്ചയില് ഫ്ലൂ ബാധിച്ച് ഓരോ ദിവസവും ശരാശരി 1861 രോഗികള് ആശുപത്രിയില് ഉണ്ടായിരുന്നു. മുന് ആഴ്ചയിലെ 1099 പേരില് നിന്നുമാണ് ഈ വര്ദ്ധന. കഴിഞ്ഞ വര്ഷം ഇതേ സമയത്ത് 402 പേര് മാത്രം എത്തിയ സ്ഥാനത്താണ് ഇക്കുറി കുതിച്ചുചാട്ടം.
നിലവില് 5 മുതല് 14 വയസ് വരെയുള്ളവരിലാണ് ഫ്ലൂ കേസുകള് ഉയര്ന്ന തോതില് കാണപ്പെടുന്നതെന്ന് യുകെ ഹെല്ത്ത് സെക്യൂരിറ്റി ഏജന്സി വ്യക്തമാക്കി. എന്നാല് സ്കൂളുകളും, നഴ്സറികളും അടയ്ക്കുന്നതോടെ മുതിര്ന്നവരിലെയും കേസുകള് വര്ദ്ധിക്കാന് തുടങ്ങുമെന്നാണ് പ്രതീക്ഷിക്കുന്നത്.
നോറോവൈറസ് കേസുകളും, കുഞ്ഞുങ്ങളില് ചുമയും, തലദോഷവും, ചെസ്റ്റ് ഇന്ഫെക്ഷനും സൃഷ്ടിക്കുന്ന ആര്എസ്വിയും ഉയരുന്നതാണ് നിലവിലെ അവസ്ഥ. കഴിഞ്ഞ ആഴ്ച 837 ബെഡുകളില് നോറോവൈറസ് ലക്ഷണങ്ങള് പ്രകടിപ്പിക്കുന്ന രോഗികളാണ് ഉണ്ടായിരുന്നതെന്ന് എന്എച്ച്എസ് ഇംഗ്ലണ്ട് പറഞ്ഞു. മുന് ആഴ്ചയില് നിന്നും 10 ശതമാനമാണ് വര്ദ്ധന.
ഓരോ ദിവസവും ആര്എസ്വി ബാധിച്ച 152 കുട്ടികളാണ് ആശുപത്രിയില് ഉണ്ടായിരുന്നത്. 1343 ബെഡുകളില് കൊവിഡ് രോഗികളാണ്. ഈ എണ്ണത്തിലാണ് അല്പ്പം കുറവ് വന്നിട്ടുള്ളത്. വിന്ററില് വിവിധ വൈറസുകള് ചേര്ന്ന് ക്വാഡ്-ഡെമിക് പടരുമെന്നാണ് ആശങ്ക.
ക്രിസ്മസ് സമയത്ത് വ്യക്തികളും, കുടുംബങ്ങളും സുരക്ഷിതരായി ഇരിക്കാന് ഫ്ലൂ വാക്സിന് സ്വീകരിക്കണമെന്നാണ് ഇപ്പോള് എന്എച്ച്എസ് അഭ്യര്ത്ഥിച്ചിരിക്കുന്നത്.
ഫ്ലൂ വാക്സിന് പൂര്ണ്ണ സംരക്ഷണം ഉറപ്പാക്കാന് രണ്ടാഴ്ചയെങ്കിലും വേണ്ടിവരും. ഇത് പ്രകാരം ക്രിസ്മസ് സമയത്ത് സുരക്ഷ ലഭിക്കണമെങ്കില് ഈ ബുധനാഴ്ചയ്ക്ക് ഉള്ളില് വാക്സിന് എടുക്കണം. ഇതിനകം തന്നെ എന്എച്ച്എസില് കനത്ത സമ്മര്ദങ്ങള് നേരിടുന്ന സ്ഥിതിയാണ്. ഫ്ലൂ, നോറോവൈറസ് കേസുകള് കുതിച്ചുയരുന്നതിനാല് സ്ഥിതി ബുദ്ധിമുട്ടായിരിക്കുമെന്ന് ആരോഗ്യ മേധാവികള് മുന്നറിയിപ്പ് നല്കിയിട്ടുണ്ട്.
ഈ ഘട്ടത്തില് ഫ്ലൂ ബാധിച്ച് ആശുപത്രിയിലുള്ള രോഗികളുടെ എണ്ണം കഴിഞ്ഞ വര്ഷത്തെ അപേക്ഷിച്ച് മൂന്നിരട്ടി അധികമാണ്. കൊവിഡ്-19, റെസ്പിറേറ്ററി സിന്സിറ്റല് വൈറസ് എന്നിവയും ഇതോടൊപ്പം പരക്കുന്നുണ്ട്. കഴിഞ്ഞ വര്ഷത്തെ ഈയാഴ്ചയിലെ കണക്കുമായി താരതമ്യം ചെയ്യുമ്പോള് 350% വര്ദ്ധനവാണ് ഫ്ളൂ നിരക്കില് രേഖപ്പെടുത്തുന്നത്.
ഫ്ലൂവിനൊപ്പം, നോറോവൈറസ് കേസുകളും വ്യാപകമാകുന്നതാണ് എന്എച്ച്എസിന് തലവേദനയായി മാറുന്നത്.
