വിന്റര് സമ്മര്ദം എന്എച്ച്എസിനെ ഇക്കുറി കൂടുതല് ഗുരുതരമായി ബാധിക്കുമെന്ന് ആശങ്ക. ഇംഗ്ലണ്ടില് രോഗബാധിതരാകുന്ന നാലിലൊന്ന് മുതിര്ന്നവര്ക്കും ഫ്ലൂ ബാധിച്ചിട്ടുണ്ടെന്നാണ് വ്യക്തമാകുന്നത്. ഇതോടെ വിന്റര് രോഗങ്ങള് എന്എച്ച്എസിലേക്ക് രോഗികളുടെ കുത്തൊഴുക്ക് സൃഷ്ടിക്കുമെന്ന ആശങ്കകള് ശക്തമായി. കഴിഞ്ഞ ആഴ്ചയുടെ അവസാനം ചുമയും, ജലദോഷവും ബാധിച്ച രോഗികളില് നടത്തിയ അഞ്ചിലൊന്ന് ടെസ്റ്റുകളും ഇന്ഫ്ളുവെന്സ വൈറസിന് പോസിറ്റീവായെന്നാണ് യുകെ ഹെല്ത്ത് സെക്യൂരിറ്റി ഏജന്സി നിരീക്ഷണ ഡാറ്റ നല്കുന്ന വിവരം.
ഇതിന് മുന്പുള്ള ആഴ്ചയില് പത്തിലൊന്ന് പോസിറ്റീവ് ടെസ്റ്റുകളാണ് ഇന്ഫ്ളുവെന്സ ബാധിച്ചതായി കണ്ടെത്തിയത്. ഇരട്ടി വേഗത്തില് രോഗികളുടെ എണ്ണം ഉയരുന്നതായി വ്യക്തമായതോടെ ജനസമൂഹത്തില് വൈറസ് വ്യാപിക്കുന്നതായാണ് സൂചന. ഈ ഘട്ടത്തില് സൗജന്യ ഫ്ലൂ വാക്സിനുകള് ലഭിക്കുന്നവര് ഇത് എത്രയും വേഗം സ്വീകരിക്കണമെന്ന് ആരോഗ്യ മേധാവികള് ആഹ്വാനം ചെയ്തു. നിലവില് വാക്സിനുകള് സ്വീകരിക്കുന്ന തോത് ഹെല്ത്ത് സര്വ്വീസിനെ സംബന്ധിച്ച് ആശ്വാസം നല്കുന്നില്ല.
കഴിഞ്ഞ വര്ഷം ഇതേ സമയം രേഖപ്പെടുത്തിയതിന്റെ മൂന്നിരട്ടി വര്ദ്ധനവാണ് പോസിറ്റീവ് കേസുകളില് റിപ്പോര്ട്ട് ചെയ്യുന്നത്. 25 മുതല് 54 വയസ്സ് വരെയുള്ളവരില് 25.7% പോസിറ്റിവിറ്റി നിരക്ക് രേഖപ്പെടുത്തുമ്പോള്, 15 മുതല് 24 വരെ പ്രായമുള്ളവരില് 26%, അഞ്ച് മുതല് 14 വരെ പ്രായമുള്ളവരില് 30 ശതമാനവും നിരക്കിലാണ് പോസിറ്റീവ് കേസുകള്. പ്രായം കുറഞ്ഞ ഗ്രൂപ്പിലാണ് കേസുകള് അധികം.
വെറും ഏഴ് ദിവസം കൊണ്ട് ആശുപത്രിയിലെത്തുന്ന കേസുകളുടെ എണ്ണത്തില് 70% വര്ദ്ധനവാണ് നേരിട്ടതെന്ന് എന്എച്ച്എസ് വ്യക്തമാക്കി. നോറോവൈറസ് കേസുകളും, കുഞ്ഞുങ്ങളില് ചുമയും, തലദോഷവും, ചെസ്റ്റ് ഇന്ഫെക്ഷനും സൃഷ്ടിക്കുന്ന ആര്എസ്വിയും ഉയരുന്നതാണ് നിലവിലെ അവസ്ഥ. കഴിഞ്ഞ ആഴ്ച 837 ബെഡുകളില് നോറോവൈറസ് ലക്ഷണങ്ങള് പ്രകടിപ്പിക്കുന്ന രോഗികളാണ് ഉണ്ടായിരുന്നതെന്ന് എന്എച്ച്എസ് ഇംഗ്ലണ്ട് പറഞ്ഞു. മുന് ആഴ്ചയില് നിന്നും 10 ശതമാനമാണ് വര്ദ്ധന.
ഓരോ ദിവസവും ആര്എസ്വി ബാധിച്ച 152 കുട്ടികളാണ് ആശുപത്രിയില് ഉണ്ടായിരുന്നത്. 1343 ബെഡുകളില് കൊവിഡ് രോഗികളാണ്. ഈ എണ്ണത്തിലാണ് അല്പ്പം കുറവ് വന്നിട്ടുള്ളത്. വിന്ററില് വിവിധ വൈറസുകള് ചേര്ന്ന് ക്വാഡ്-ഡെമിക് പടരുമെന്നാണ് ആശങ്ക.
ക്രിസ്മസ് സമയത്ത് വ്യക്തികളും, കുടുംബങ്ങളും സുരക്ഷിതരായി ഇരിക്കാന് ഫ്ലൂ വാക്സിന് സ്വീകരിക്കണമെന്നാണ് ഇപ്പോള് എന്എച്ച്എസ് അഭ്യര്ത്ഥിച്ചിരിക്കുന്നത്.
ഫ്ലൂ വാക്സിന് പൂര്ണ്ണ സംരക്ഷണം ഉറപ്പാക്കാന് രണ്ടാഴ്ചയെങ്കിലും വേണ്ടിവരും. ഇത് പ്രകാരം ക്രിസ്മസ് സമയത്ത് സുരക്ഷ ലഭിക്കണമെങ്കില് ഈ ബുധനാഴ്ചയ്ക്ക് ഉള്ളില് വാക്സിന് എടുക്കണം. ഇതിനകം തന്നെ എന്എച്ച്എസില് കനത്ത സമ്മര്ദങ്ങള് നേരിടുന്ന സ്ഥിതിയാണ്. ഫ്ലൂ, നോറോവൈറസ് കേസുകള് കുതിച്ചുയരുന്നതിനാല് സ്ഥിതി ബുദ്ധിമുട്ടായിരിക്കുമെന്ന് ആരോഗ്യ മേധാവികള് മുന്നറിയിപ്പ് നല്കിയിട്ടുണ്ട്.
