പലവിധ സമ്മര്ദങ്ങള്ക്ക് വിധേയമായി അടുത്ത ഏതാനും വര്ഷങ്ങള്ക്കുള്ളില് ബ്രിട്ടനില് 32,000-ലേറെ നഴ്സിംഗ് വിദ്യാര്ത്ഥികള് കോഴ്സുകള് പൂര്ത്തിയാക്കാന് നില്ക്കാതെ പഠനം അവസാനിപ്പിക്കുമെന്ന് മുന്നറിയിപ്പ്. സാമ്പത്തിക സമ്മര്ദങ്ങള്ക്ക് പുറമെ എന്എച്ച്എസ് സേവനങ്ങള് സമ്മര്ദത്തില് അമരുന്നതും, വരുമാന സാധ്യതകള് മോശമാകുന്നതും ചേര്ന്നാണ് നഴ്സിംഗ് വിദ്യാര്ത്ഥികളെ ഈ വിധം വഴിമാറി സഞ്ചരിക്കാന് പ്രേരിപ്പിക്കുന്നതെന്ന് റോയല് കോളേജ് ഓഫ് നഴ്സിംഗ് മുന്നറിയിപ്പ് നല്കുന്നു.
കരിയര് മെച്ചപ്പെടുത്താനുള്ള നടപടികള് ഇല്ലാത്ത പക്ഷം എന്എച്ച്എസിനെ പരിഷ്കരിക്കാനുള്ള ഗവണ്മെന്റ് പദ്ധതികള് അട്ടിമറിക്കപ്പെടുമെന്നാണ് തങ്ങളുടെ പഠനം വ്യക്തമാക്കുന്നതെന്ന് റോയല് കോളേജ് ഓഫ് നഴ്സിംഗ് വ്യക്തമാക്കി. 2016-ല് നഴ്സിംഗ് ബഴ്സാറി അടച്ചത് മുതല് ഇംഗ്ലണ്ടില് സ്റ്റുഡന്റ് നഴ്സുമാര് പഠനം പാതിവഴിയില് ഉപേക്ഷിക്കുന്നുണ്ട്. എന്നാല് 2029 ആകുന്നതോടെ ഈ എണ്ണം പതിനായിരങ്ങള് കടക്കുമെന്ന് ആര്സിഎന് വ്യക്തമാക്കി.
ഈ വര്ഷം ആദ്യം ഇംഗ്ലണ്ടിലെ നഴ്സിംഗ് വിദ്യാര്ത്ഥികള്ക്കിടയില് നടത്തിയ സര്വ്വെയില് പത്തില് ഏഴ് പേരാണ് സാമ്പത്തിക സമ്മര്ദങ്ങള് മൂലം പഠനം നിര്ത്താന് ആഗ്രഹിക്കുന്നതെന്ന് ആര്സിഎന് വെളിപ്പെടുത്തിയിരുന്നു. കടഭാരം നേരിടുകയും, ജീവിതച്ചെലവ് സമ്മര്ദം കൈകാര്യം ചെയ്യുകയുമാണ് ഏറ്റവും നല്ല പോംവഴികളെന്ന് ആര്സിഎന് പറയുന്നു. കൂടാതെ നഴ്സുമാരുടെ ശമ്പളം വര്ദ്ധിപ്പിച്ച് കരിയര് ആകര്ഷകമാക്കുകയും വേണം, യൂണിയന് ആവശ്യപ്പെടുന്നു.
നിലവില് ഇംഗ്ലണ്ടിലെ ഹെല്ത്ത് സര്വ്വീസില് 31,774 നഴ്സിംഗ് തസ്തികകള് ഒഴിഞ്ഞ് കിടക്കുന്നുണ്ടെന്നാണ് കണക്ക്. നിലവിലെ വിദ്യാര്ത്ഥികളാണ് ഭാവിയിലെ നഴ്സുമാര്. എന്നാല് അവരില് പതിനായിരങ്ങളാണ് ഗ്രാജുവേറ്റ് കടം താങ്ങാന് കഴിയാതെ പഠനം ഉപേക്ഷിക്കാന് നില്ക്കുന്നത്. ഇത് വിദ്യാര്ത്ഥികള്ക്കും, രോഗികള്ക്കും ദുരന്തമാകും, ആര്സിഎന് ജനറല് സെക്രട്ടറി പ്രൊഫ നിക്കോള റേഞ്ചര് വ്യക്തമാക്കി.
