ലോക നിവാരത്തിലുള്ള വിദ്യാഭ്യാസം ആയിരുന്നു പണമുതലെ യുകെയുടെ മുഖമുദ്ര. അതിപ്രശസ്ത സര്വകലാശാലകള്ക്കും വിദ്യാഭ്യാസ മേഖലയ്ക്കും പേരു കേട്ട യു കെയില് അടിസ്ഥാന സ്കൂള് വിദ്യാഭ്യാസത്തിന്റെ ഗുണമേന്മയെ കുറിച്ച് സമീപകാലത്ത് ആശങ്കകള് കൂടി വരുകയാണ്. എല്ലാ രംഗത്തും പുരോഗതി കൈവരിക്കുമ്പോഴും കുട്ടികളുടെ സ്കൂള് വിദ്യാഭ്യാസത്തില് പല പ്രദേശങ്ങളിലും രാജ്യത്ത് ഒട്ടേറെ പ്രശ്നങ്ങള് നേരിടുന്നുണ്ട്.
അധ്യാപക ക്ഷാമം മുതല് പ്രാദേശിക സ്കൂളുകള് നേരിടുന്ന സാമ്പത്തിക പ്രതിസന്ധി, ഭൂമിശാസ്ത്ര പരമായും സാമൂഹിക സാമ്പത്തിക പശ്ചാത്തലങ്ങളും അടിസ്ഥാനമാക്കിയുള്ള അസമത്വം, മാനസികാരോഗ്യ പ്രശ്നങ്ങള് തുടങ്ങി ഒട്ടേറെ ഘടകങ്ങള് സ്കൂള് വിദ്യാഭ്യാസ മേഖലയില് സ്വാധീനം ചെലുത്തുന്നതായി ആണ് ഈ രംഗത്തെ വിദഗ്ദര് അഭിപ്രായപ്പെടുന്നത്. ശരിയായ സ്കൂള് വിദ്യാഭ്യാസത്തിന്റെ അഭാവം വ്യക്തികളിലും സമൂഹത്തിലും ദീര്ഘകാല പ്രത്യാഘാതങ്ങള് ഉണ്ടാക്കുന്നതായി ഒട്ടേറെ ഗവേഷണ റിപ്പോര്ട്ടുകള് സാക്ഷ്യപ്പെടുത്തുന്നുണ്ട്.
ഏറ്റവും പുതിയ സര്ക്കാര് കണക്കുകള് പ്രകാരം ഇംഗ്ലണ്ടില് വീട്ടിലിരുന്ന് പഠിക്കുന്ന കുട്ടികളുടെ എണ്ണം ഈ വര്ഷം 20% വര്ദ്ധിച്ചു. 300,000 കുട്ടികള് വരെ വിദ്യാഭ്യാസത്തില് നിന്ന് പൂര്ണ്ണമായി നഷ്ടപ്പെട്ടേക്കാമെന്ന് എജ്യുക്കേഷന് പോളിസി ഇന്സ്റ്റിറ്റ്യൂട്ട് മുന്നറിയിപ്പ് നല്കി.
രാജ്യത്തെ സ്കൂള് വിദ്യാഭ്യാസത്തിന്റെ ഗുണനിലവാരം മെച്ചപ്പെടുത്തുന്നതിനും സാമ്പത്തിക പ്രാദേശിക അസമത്വങ്ങളില്ലാതെ എല്ലാവര്ക്കും പ്രാഥമിക വിദ്യാഭ്യാസം ലഭിക്കുന്നതിനുമുള്ള സുപ്രധാന നടപടികള് സര്ക്കാര് തലത്തില് ആരംഭിക്കുന്നതായുള്ള റിപ്പോര്ട്ടുകള് പുറത്തു വന്നു. ഇതിന്റെ ഭാഗമായി സ്കൂളുകളില് എത്താത്ത കുട്ടികളെ രജിസ്റ്റര് ചെയ്യാനുള്ള നടപടികള് ഇന്ന് പാര്ലമെന്റില് അവതരിപ്പിക്കും.
കുട്ടികള് എവിടെയാണെന്നുള്ള അറിവ് ഉയര്ന്ന നിലവാരമുള്ള വിദ്യാഭ്യാസം നല്കുന്നുണ്ടെന്ന് ഉറപ്പുവരുത്താനും ആവശ്യമായ പിന്തുണ നല്കാനും കൗണ്സിലുകളെ പ്രാപ്തരാക്കുമെന്ന് വിദ്യാഭ്യാസ വകുപ്പ് പറയുന്നു. കുട്ടികളുടെ അവകാശ സംരക്ഷണത്തിനുള്ള സുപ്രധാന ചുവടുവെപ്പാണ് ഇതെന്നാണ് ബില്ലിനെ കുറിച്ച് വിദ്യാഭ്യാസ സെക്രട്ടറി ബ്രിഡ്ജറ്റ് ഫിലിപ്പ്സണ് പറഞ്ഞത്.
ഇന്ന് അവതരിപ്പിക്കുന്ന ബില്ലില് വിഭാവനം ചെയ്തിരിക്കുന്ന കുട്ടികളുടെ രജിസ്റ്റര് 2025 - ല് പ്രാബല്യത്തില് വരുമെന്നാണ് പ്രതീക്ഷിക്കുന്നത്. ബില്ലില് മുതിര്ന്നവരുടെ ദേശീയ ഇന്ഷുറന്സ് നമ്പറിന് സമാനമായി കുട്ടികള്ക്ക് അവരെ തിരിച്ചറിയുന്നതിനുള്ള ഒരു നമ്പള് ഉണ്ടായിരിക്കും. തങ്ങളുടെ പ്രദേശത്തെ കുട്ടികളുടെ സംരക്ഷണവുമായി ബന്ധപ്പെട്ട കാര്യങ്ങളില് സമയോചിതമായി ഇടപെടല് നടത്തുന്നതിന് അധ്യാപകര്ക്കും സ്കൂള് അധികാരികള്ക്കും അവകാശം ഉണ്ടാകും.
കുട്ടികളും അവരുടെ ജീവിത സാഹചര്യവും സുരക്ഷിതമല്ലെന്ന് കണ്ടെത്തിയാല് ഉചിതമായ നടപടികള് സ്വീകരിക്കുന്നതിന് ഉത്തരവാദിത്തപ്പെട്ടവര്ക്ക് കൂടുതല് അധികാരങ്ങള് നല്കാനും ബില്ലില് വ്യവസ്ഥ ഉണ്ടായിരിക്കും. കഴിഞ്ഞ ദിവസങ്ങളില് 10 വയസ്സുകാരിയായ സാറാ സരീഫിനെ വീട്ടിലിരുന്ന് പഠിപ്പിക്കുന്നതിനായി പിതാവും രണ്ടാനമ്മയും എടുത്ത തീരുമാനവും തുടര്ന്ന് അവളെ മരണത്തിലേയ്ക്ക് തള്ളിവിട്ടതു പോലുള്ള സംഭവങ്ങളും ഇനി ആവര്ത്തിക്കാതിരിക്കാനുള്ള കടുത്ത നടപടികള് ബില്ലില് ശുപാര്ശ ചെയ്തിട്ടുണ്ടെന്നാണ് പുറത്തുവരുന്ന വിവരങ്ങള് സൂചിപ്പിക്കുന്നത്.
