നീണ്ട കാത്തിരിപ്പ് ഒഴിവാക്കി ഡ്രൈവിങ് ടെസ്റ്റില് മാറ്റം കൊണ്ടുവരാന് സര്ക്കാര്
ഡ്രൈവിങ് ലൈസന്സ് സ്വന്തമാക്കാന് നീണ്ട കാത്തിരിപ്പില് കഴിയുന്നവര് നിരവധിയാണ്. ഈ കാത്തിരിപ്പു സമയം ഇനി കുറയും. ഡ്രൈവിങ് ടെസ്റ്റില് മാറ്റം കൊണ്ടുവരാന് സര്ക്കാര് തീരുമാനിച്ചിരിക്കുകയാണ്. ഇതിനായി കൂടുതല് എക്സാമിനര്മാരെ നിയമിക്കുകയാണ് സര്ക്കാര്. ലൈസന്സിനായുള്ളകാത്തിരിപ്പ് ഒരു വര്ഷത്തില് നിന്ന് ഏഴു മാസമായി കുറയും.
വിപുലമായ പദ്ധതികളാണ് സര്ക്കാര് നടപ്പാക്കുന്നതെന്ന് മന്ത്രി ലിലിയന് ഗ്രീന്വുഡ് പറഞ്ഞു. ഡിപ്പാര്ട്ട്മെന്റ് ഫോര് ട്രാന്സ്പോര്ട്ട് പുറത്തുവിട്ട കണക്കില് മാര്ച്ച് അവസാനം വരെയുള്ള 12 മാസത്തിനുള്ളില് ഡ്രൈവിങ് ടെസ്റ്റുകള്ക്കായി കാത്തിരിക്കുന്നവരുടെ എണ്ണം 1.9 ദശലക്ഷമായി. ഈ കാത്തിരിപ്പിന് വിരാമമിടാനാണ് മന്ത്രിയുടെ ശ്രമം.
രാജ്യത്താകെ 450 ഡ്രൈവിങ് എക്സാമിനര്മാരുടെ റിക്രൂട്ട്മെന്റും പരിശീലനവുമാണ് പ്രധാന പദ്ധതി. പരാജയപ്പെട്ടാല് പുതിയ ടെസ്റ്റുകള് ബുക്ക് ചെയ്യുന്നതിനുള്ള സമയം വര്ധിപ്പിക്കാനുള്ള ആലോചനയും നടക്കുന്നുണ്ട്. തോറ്റാല് അടുത്ത ടെസ്റ്റിനായി പത്തു വര്ക്കിങ് ഡേയ്സ് കാത്തിരിക്കണം. ഏതായാലും പുതിയ പരിഷ്കാരങ്ങള് വൈകാതെ നടപ്പാക്കും.
ലൈസന്സ് എടുക്കുന്നവരെ ചൂഷണം ചെയ്യുന്ന രീതികളുണ്ടെന്നും അത് ഒഴിവാക്കാനായി സര്ക്കാര് നടപടികൊണ്ടുവരുമെന്നും ലിലിയന് ഗ്രീന്വുഡ് പറഞ്ഞു.
ഡ്രൈവിങ് ടെസ്റ്റിനായി അഞ്ചുമാസം നീണ്ട കാത്തിരിപ്പിലാണ് പലരും. കോവിഡ് പ്രതിസന്ധിയ്ക്ക് പിന്നാലെ എല്ലാം താളം തെറ്റിയിരിക്കുകയാണ്. ഡ്രൈവിങ് ലൈസന്സ് എടുക്കാന് ആഗ്രഹിക്കുന്നവര്ക്ക് വലിയ ബുദ്ധിമുട്ടുകളും കാത്തിരിപ്പുമില്ലാതെ കാര്യങ്ങള് നടപ്പാക്കാനുള്ള ശ്രമത്തിലാണ് പുതിയ പദ്ധതികള് കൊണ്ടുവന്നിരിക്കുന്നത്.
