സിനിമാ-സീരിയല് നടന് ദിലീപ് ശങ്കറിന്റെ മരണം ആത്മഹത്യയല്ലെന്ന് പൊലീസിന്റെ പ്രാഥമിക നിഗമനം. ദിലീപ് ശങ്കര് മുറിയില് തലയിടിച്ച് വീണെന്നും ഇതുമൂലം ഉണ്ടായ ആന്തരിക രക്തസ്രാവം ആവാം മരണത്തിലേക്ക് നയിച്ചതെന്നുമാണ് പൊലീസ് നിഗമനം. മുറിയില് നിന്ന് മദ്യക്കുപ്പികള് ഉള്പ്പെടെ കണ്ടെത്തി. ആന്തരിക അവയവങ്ങള് ശാസ്ത്രീയ പരിശോധനയ്ക്ക് അയച്ചു. ഹോട്ടല് ജീവനക്കാരുടെ ഉള്പ്പെടെ മൊഴി രേഖപ്പെടുത്തി.
മുറിയില് നടത്തിയ പരിശോധനയില് ആത്മഹത്യയിലേക്ക് നയിക്കുന്ന തെളിവുകള് ലഭിച്ചില്ലെന്നും പൊലീസ് അറിയിച്ചു. പോസ്റ്റ്മോര്ട്ടം റിപ്പോര്ട്ട് ലഭിച്ചശേഷം തുടര്ന്ന് നടപടികള് സ്വീകരിക്കും. ഇന്നലെയാണ് സിനിമാ – സീരിയല് നടന് ദിലീപ് ശങ്കറിനെ തിരുവനന്തപുരത്തെ സ്വകാര്യ ഹോട്ടലിനുള്ളില് മരിച്ച നിലയില് കണ്ടെത്തിയത്. രണ്ടു ദിവസം മുന്പാണു ദിലീപ് ശങ്കര് ഹോട്ടലില് മുറിയെടുത്തത്. എന്നാല് മുറി വിട്ട് പുറത്തേക്കൊന്നും പോയിരുന്നില്ലെന്നാണ് വിവരം.
ദുര്ഗന്ധം വമിച്ചതോടെ ഹോട്ടല് ജീവനക്കാര് മുറി തുറന്നു നോക്കി. ഇതോടെയാണു നടനെ മരിച്ച നിലയില് കണ്ടെത്തിയത്. എറണാകുളത്താണു ദിലീപ് ശങ്കറിന്റെ വീട്. സീരിയല് ഷൂട്ടിങ്ങിനായാണ് തിരുവനന്തപുരത്ത് എത്തിയത്. ഷൂട്ടിങ്ങിനു രണ്ടു ദിവസം ഇടവേള ഉണ്ടായിരുന്നുവെന്നും തങ്ങളില് പലരും വിളിച്ചിട്ടും ദിലീപ് ശങ്കര് ഫോണെടുത്തിരുന്നില്ലെന്നും സീരിയല് സംവിധായകന് പറഞ്ഞിരുന്നു.
ചാപ്പാ കുരിശ്, നോര്ത്ത് 24 കാതം തുടങ്ങിയ സിനിമകളിലും നിരവധി സീരിയലുകളിലും ദിലീപ് ശങ്കര് അഭിനയിച്ചിട്ടുണ്ട്. അഭിനയത്തിനു പുറമേ ബിസിനസ് രംഗത്തും സജീവമായിരുന്നു ദിലീപ് ശങ്കര്. ചപ്പാത്തി, ദോശമാവ് തുടങ്ങിയ റെഡി ടു ഈറ്റ് വിഭവങ്ങളാണ് ഇദ്ദേഹത്തിന്റെ കമ്പനി വിപണിയിലെത്തിക്കുന്നത്. ഭാര്യ സുമയാണ് ബിസിനസ് കാര്യങ്ങള് കൂടുതലും നോക്കിയിരുന്നത്. ബെംഗളൂരുവില് ജോലിചെയ്യുന്ന ദേവ, വിദ്യാര്ഥിയായ ധ്രുവ് എന്നിവരാണ് മക്കള്.
