വന്യജീവി ആക്രമണത്തില് സര്ക്കാരിനെതിരെ പ്രതികരിച്ച താമരശ്ശേരി, കാഞ്ഞിരപ്പള്ളി രൂപത ബിഷപ്പുമാരെ പരിഹസിച്ച് വനംമന്ത്രി എ കെ ശശീന്ദ്രന്. ബിഷപ്പുമാര് എന്നൊക്കെയാണ് ഞാന് ധരിച്ചു വെച്ചത്, ചിലസമയം അത് അങ്ങനെയാണോ എന്ന് സംശയമുണ്ടെന്നും വനംമന്ത്രി പരിഹസിച്ചു. രാജിവെക്കണം എന്നു പറയുന്നത് ഒരു രാഷ്ട്രീയ ആവശ്യമാണെന്നും ബിഷപ്പുയര്ത്തിയത് അങ്ങനെയാണോ എന്ന് സംശയമുണ്ടെന്നും മന്ത്രി പറഞ്ഞു.
ബിഷപ്പുമാരായ മാര് ജോസ് പുളിക്കല്, മാര് റെമീജിയോസ് ഇഞ്ചനാനിയില് എന്നിവരാണ് സര്ക്കാരിനെതിരെ വിമര്ശനവുമായി രംഗത്തെത്തിയത്. സംസ്ഥാനത്തെ വന്യജീവി ആക്രമണത്തില് പ്രതികരിച്ചാണ് ബിഷപ്പുമാര് രംഗത്തെത്തിയത്. വനംമന്ത്രി രാജിവെക്കണമെന്നും ഇവിടെ ഒരു സര്ക്കാര് ഉണ്ടോ എന്ന് അറിയുകയാണ് നമ്മുടെ ആവശ്യമെന്നും ബിഷപ്പുമാര് പറഞ്ഞിരുന്നു. കാഞ്ഞിരപ്പള്ളി പാറത്തോട്ടില് നടന്ന ഇന്ഫാം സംസ്ഥാന അസംബ്ലിയില് സംസാരിക്കവെയാണ് ബിഷപ്പുമാരായ മാര് ജോസ് പുളിക്കല്, മാര് റെമീജിയോസ് ഇഞ്ചനാനിയില് എന്നിവരുടെ വിമര്ശനം.
വന്യജീവി ആക്രമണത്തില് ആളുകള് കൊല്ലപ്പെടുമ്പോള് സര്ക്കാരും വനംവകുപ്പും നോക്കുകുത്തികളായി നില്കുകയാണെന്ന് ബിഷപ്പുമാര് ആരോപിച്ചു. കര്ഷകരായതുകൊണ്ട് കാര്ഷിക മേഖലയിലുള്ള ആളുകള്ക്ക് ജീവിക്കാനുള്ള അവകാശമില്ലേയെന്ന് താമരശ്ശേരി ബിഷപ്പ് ചോദിച്ചു. ഇവിടെ എവിടെയാണ് ഭരണം നടക്കുന്നതെന്നാണ് ചോദിക്കാനുള്ളത്. ഇത്തരത്തില് നടക്കുന്ന വന്യജീവി ആക്രമണങ്ങളില് സര്ക്കാരിനും വനം വകുപ്പിനും യാതൊരു ഉത്തരവാദിത്തവുമില്ലേയെന്നും താമരശേരി അതിരൂപത ബിഷപ്പ് മാര് റെമീജിയോസ് ഇഞ്ചനാനിയില് ചോദിച്ചു.
വന്യ ജീവി ആക്രമണങ്ങള് തുടര്ക്കഥയാകുന്ന ഈ സാഹചര്യത്തില് സംഭവങ്ങളുടെ ഉത്തരവാദിത്തം ഏറ്റെടുത്ത് രാജിവെക്കാന് വനംമന്ത്രി തയ്യാറാവണം. ധാര്മികമായ ഉത്തരവാദിത്തം ഏറ്റെടുത്ത് ഈ സംഭവങ്ങള്ക്ക് അദ്ദേഹം മറുപടി പറയാന് തയാറാകണമെന്നാണ് നമ്മളുടെയും ഇന്ഫാമിന്റെയും ആവശ്യമെന്നും ബിഷപ്പ് പറഞ്ഞു. ഇവിടെ ഒരു സര്ക്കാര് ഉണ്ടോയെന്ന് അറിയുകയാണ് നമ്മുടെ ആവശ്യം. വരും ദിവസങ്ങളില് ഇക്കാര്യം ഉയര്ത്തിപിടിച്ച് വന് പ്രക്ഷോഭ പരിപാടികളുമായി നമ്മള് മുന്നോട്ട് പോകുമെന്നും ബിഷപ്പ് ആഹ്വാനം ചെയ്തു. അതേസമയം വന്യജീവി ആക്രമണങ്ങളില് ആളുകള് കൊല്ലപ്പെടുമ്പോള് സര്ക്കാരും വനംമന്ത്രിയും എവിടെ പോയെന്നാണ് കാഞ്ഞിരപ്പള്ളി ബിഷപ്പ് മാര് ജോസ് പുളിക്കന് ചോദിച്ചു.
അതേസമയം, വന്യജീവി സംഘര്ഷം സംബന്ധിച്ച പ്രതിപക്ഷ നേതാവിന്റെയും താമരശേരി ബിഷപ്പിന്റെയും വിമര്ശനങ്ങള്ക്ക് പരിഹസിച്ചുകൊണ്ടാണ് വനംമന്ത്രി മറുപടി നല്കിയത്. കെപിസിസി അധ്യക്ഷന് തന്റെ പരാജയം സ്വയം സമ്മതിച്ചയാളാണ്. ബിഷപ്പുമാര് എന്നൊക്കെയാണ് ഞാന് ധരിച്ചു വെച്ചത്, ചിലസമയം അത് അങ്ങനെയാണോ എന്ന് സംശയമുണ്ടെന്നും വനംമന്ത്രി പറഞ്ഞു. ഒരു മന്ത്രിയെ വിലയിരുത്താന് എല്ലാ പൗരന്മാര്ക്കും അവകാശമുണ്ട്. രാജിവെക്കണം എന്നു പറയുന്നത് ഒരു രാഷ്ട്രീയ ആവശ്യമാണ്. ബിഷപ്പുയര്ത്തിയത് അങ്ങനെയാണോ എന്ന് സംശയമുണ്ട്. രാജിവെച്ചാല് ഉയര്ന്നുവന്ന പ്രശ്നം തീരുമോയെന്നും എ കെ ശശീന്ദ്രന് ചോദിച്ചു.
