ലണ്ടന്: മദ്യപിച്ച് വാഹനമോടിക്കുന്നവരെയും അമിത വേഗതയില് വാഹനമോടിക്കുന്നവരെയും ഒരു മൈല് ദൂരത്തു നിന്നു തന്നെ കണ്ടെത്താന് കഴിയുന്ന ആധുനിക സാങ്കേതിക വിദ്യയുണ്ടെന്ന് അവകാശപ്പെടുന്ന കാമറകള് പോലീസിന്. സീറ്റ് ബെല്റ്റ് ധരിക്കാത്തവരെയും വാഹനമോടിക്കുമ്പോള് മൊബൈല് ഫോണ് ഉപയോഗിക്കുന്നവരെയും കണ്ടെത്താന് ഇതിന് കഴിയുമെന്നാണ് പോലീസ് അവകാശപ്പെടുന്നത്. ഓരോന്നിനും 47,000 പൗണ്ട് വിലവരുന്ന, ക്യാമറ ഘടിപ്പിച്ച നാല് പുതിയ വാനുകളായിരിക്കും മിഡ്ലാന്ഡ്സിലെ തെരുവുകളില് ഇനി ഗതാഗത നിയമങ്ങള് ലംഘിക്കുന്നവരെ പിടികൂടുന്നതിനായി വിന്യസിക്കുക.
ദിവസം 24 മണിക്കൂറും പ്രവര്ത്തിപ്പിക്കാവുന്ന ഈ സംവിധാനം ആഴ്ചയില് ഏഴു ദിവസവും പ്രവര്ത്തനക്ഷമമായിരിക്കും. ഇതിന് അനുമതി നല്കിയതായി പോലീസ് ആന്ഡ് ക്രൈം കമ്മീഷണര് സൈമണ് ഫോസ്റ്റര് പറഞ്ഞു. 2023ല് 1149 പേരാണ് വെസ്റ്റ് മിഡ്ലാന്ഡ്സില് അപകടങ്ങളില് മരണപ്പെടുകയോ ഗുരുതരമായി പരിക്കേല്ക്കുകയോ ചെയ്തതെന്നും അദ്ദേഹം ചൂണ്ടിക്കാണിച്ചു. റോഡപകടങ്ങളുടെ ഒരു പ്രധാന കാരണം അമിതവേഗതയാണെന്ന് പറഞ്ഞ ഫോസ്റ്റര്, അതാണ് താനും പോലീസും തടയാന് ശ്രമിക്കുന്നതെന്നും പറഞ്ഞു.
സേഫര് സ്ട്രീറ്റ്സ് ഫണ്ട് വഴിയുള്ള ഈ നിക്ഷേപം അമിതവേഗത്തില് വാഹനമോടിക്കുന്നവരെ പിടികൂടാനും റോഡുകള് കൂടുതല് സുരക്ഷിതമാക്കുവാനും തങ്ങളെ സഹായിക്കുമെന്നും അദ്ദേഹം പ്രത്യാശ പ്രകടിപ്പിച്ചു. തങ്ങളുടെ മേഖലയില് അപകടകരമായ രീതിയില് വാഹനമോടിക്കുന്നതിനോ, അശ്രദ്ധമായി വാഹനമോടിക്കുന്നതിനോ അനുവാദമില്ലെന്നും അദ്ദേഹം വ്യക്തമാക്കി. വേഗതാ പരിധി ലംഘിച്ച് വാഹനമോടിച്ചതിന്റെ ഫലമായി നിരവധി നിരപരാധികള്ക്കാണ് ജീവന് നഷ്ടമായതെന്നും അത് ഒരു കാരണവശാലും അനുവദിക്കില്ലെന്നും അദ്ദേഹം ഉറപ്പിച്ചു പറഞ്ഞു.
ആധുനിക നിര്മ്മിതി ബുദ്ധി സാങ്കേതിക വിദ്യയുള്ള ഈ ക്യാമറകള്ക്ക് സീറ്റ് ബെല്റ്റ് ധരിക്കാത്തവരെയും അതുപോലെ വാഹനമോടിക്കുമ്പോള് മൊബൈല് ഫോണ് ഉപയോഗിക്കുന്നവരെയും കണ്ടെത്താന് കഴിയും. രാജ്യത്തെ തിരക്കേറിയ റോഡുകളില് ഒന്നായ എ 30 ല് ഡെവണ് സമീപം ഈ ക്യാമറ വിന്യസിച്ചപ്പോള് മൂന്ന് ദിവസങ്ങളില് ട്രാഫിക് നിയമങ്ങള് ലംഘിച്ച 300 പേരെയാണ് ഇത് പിടികൂടിയത്. ഉയര്ന്ന റെസലൂഷനിലുള്ള ചിത്രങ്ങള് എടുത്ത ശേഷം എ ഐ സോഫ്റ്റ്വെയറാണ് നിയമ ലംഘന നടന്നിട്ടുണ്ടോ എന്ന് പരിശോധിക്കുക.
നിയമ ലംഘനം നടന്നു എന്ന് ബോദ്ധ്യപ്പെട്ടാല് അത് ഉടനടി പോലീസിന് അയയ്ക്കും. പോലീസ് ഉദ്യോഗസ്ഥര് ആ ചിത്രങ്ങള് വ്യക്തിപരമായി പരിശോധിച്ച് നിയമലംഘനം നടന്നു എന്ന് കണ്ടാല് ഉചിതമായ നടപടികള് സ്വീകരിക്കും. സാധാരണയായി ആദ്യ തവണ മുന്നറിയിപ്പ് നോട്ടീസ് അയയ്ക്കുകയാകും ചെയ്യുക. കുറ്റം ആവര്ത്തിച്ചാല് പ്രോസിക്യൂഷന് നടപടികളിലേക്ക് വരെ കാര്യങ്ങള് നീങ്ങിയേക്കാം. 2022 സെപ്റ്റംബറില് ഡെവണില് ഇത് 15 ദിവസം പരീക്ഷണാര്ത്ഥം സ്ഥാപിച്ചിരുന്നു.
