ഇടുക്കിയില് ജീപ്പ് കൊക്കയിലേയ്ക്ക് മറിഞ്ഞ് 3 പേര് മരിച്ച സംഭവം യുകെ മലയാളി സമൂഹത്തിനും തീരാവേദനയായി
ഇടുക്കി ജില്ലയിലെ പന്നിയാര്കുട്ടിയില് ജീപ്പ് കൊക്കയിലേയ്ക്ക് മറിഞ്ഞ് മൂന്ന് പേര് മരിച്ച സംഭവം യുകെയിലെ മലയാളി സമൂഹത്തിനും തീരാ വേദനയായി. അപകടത്തില് മരിച്ച ഇടയോടിയില് ബോസ് (59), ഭാര്യ റീന (54) എന്നിവരുടെ മകള് ആനി യുകെയിലെ ഗ്ലോസ്റ്ററില് ആണ് താമസിക്കുന്നത്. കൂടാതെ ബോസിന്റെ സഹോദരന് ജോമിയും ഭാര്യയും വര്ഷങ്ങളായി വെസ്റ്റ് യോര്ക്ക് ഷെയറിലെ ഹഡേഴ്സ് ഫീല്ഡില് ആണ് ജോലി ചെയ്യുന്നത്.
വെള്ളിയാഴ്ച രാത്രി 10.30 നായിരുന്നു അപകടം. കഴിഞ്ഞ ദിവസം രാവിലെ മൂന്ന് മണിയോടെയാണ് അപകട വിവരം യുകെയില് അറിയുന്നത്. അപകട വിവരം അറിഞ്ഞയുടനെ ബോസിന്റെ മകള് ആനിയും സഹോദരന് ജോമിയും നാട്ടിലേക്ക് തിരിച്ചിരുന്നു.
സംസ്കാര ശുശ്രൂഷകള് തിങ്കളാഴ്ച രാവിലെ 10 ന് പന്നിയാര്കുട്ടി സെന്റ് മേരീസ് ദേവാലയത്തില് വച്ച് നടക്കും. ബോസും കുടുംബവും ഏതാനും വര്ഷം മുന്പ് ഉണ്ടായ ഒരു ഉരുള്പൊട്ടലില് നിന്ന് തലനാരിഴയ്ക്ക് രക്ഷപ്പെട്ടിരുന്നു. അന്ന് ഉണ്ടായ ഉരുള്പൊട്ടലില് ബോസിന്റെയും കുടുംബത്തിന്റെയും വീടും സ്ഥലവും ഒലിച്ചു പോയിരുന്നു.
പന്നിയാര്കുട്ടി പുതിയ പാലത്തിനു സമീപമാണ് ബോസും ഭാര്യയും താമസിക്കുന്നത്. മുല്ലക്കാനത്ത് ബന്ധുവീട്ടില് പോയി തിരികെ വരികയായിരുന്ന ഇവര് സഞ്ചരിച്ചിരുന്ന ജീപ്പ് പന്നിയാര് കുട്ടി പള്ളിക്ക് സമീപം എത്തിയപ്പോള് നിയന്ത്രണം വിട്ട് നൂറടി താഴ്ചയിലേക്ക് മറിയുകയായിരുന്നു. സംഭവം നടന്ന സ്ഥലം കുത്തനെയുള്ള ഇറക്കവും റോഡിന് വീതി കുറഞ്ഞ പ്രദേശവുമാണ്.
