'എമ്പുരാന്' സിനിമാ വിവാദങ്ങള്ക്ക് പിന്നാലെ പൃഥ്വിരാജിന് ആദായ നികുതി വകുപ്പിന്റെ നോട്ടീസ്. കടുവ, ജനഗണമന, ഗോള്ഡ് എന്നീ മൂന്ന് സിനിമകളുടെ പ്രതിഫലം സംബന്ധിച്ച വിവരങ്ങള് നല്കണം എന്നാണ് ഇന്കംടാക്സ് അധികൃതര് ആവശ്യപ്പെട്ടിരിക്കുന്നത്. ഈ സിനിമകളില് പൃഥ്വിരാജ് പ്രതിഫലം വാങ്ങിയിരുന്നില്ല.
എന്നാല് സഹനിര്മ്മാതാവെന്ന നിലയില് 40 കോടിയോളം രൂപ പൃഥ്വിരാജ് ചിത്രങ്ങളില് നിന്നും നേടി എന്നാണ് കണ്ടെത്തിയിരിക്കുന്നത്. നിര്മ്മാണ കമ്പനിയുടെ പേരില് പണം വാങ്ങിയതില് വ്യക്തത വരുത്തണമെന്ന് ആദായനികുതി വകുപ്പ് ആവശ്യപ്പെട്ടു.
മാര്ച്ച് 29 നാണ് കൊച്ചി ആദായ നികുതി വകുപ്പ് ഓഫീസില് നിന്ന് പൃഥ്വിരാജിന് നോട്ടീസ് അയച്ചത്. വരുന്ന ഏപ്രില് 29-നകം വിശദീകരണം നല്കണമെന്നാണ് നിര്ദേശം. ഇത് സ്വാഭാവിക നടപടിയാണ് എന്നാണ് ആദായ നികുതി വകുപ്പിന്റെ വിശദീരണം.
അതേസമയം, എമ്പുരാന്റെ നിര്മ്മാതാക്കളില് ഒരാളായ ഗോകുലം മൂവീസ് ഉടമ ഗോകുലം ഗോപാലന്റെ സ്ഥാപനങ്ങളില് ഇഡി റെയ്ഡ് നടക്കുന്ന പശ്ചാത്തലത്തില് തന്നെയാണ് ചിത്രത്തിന്റെ സംവിധായകനായ പൃഥ്വിരാജിനെതിരെയുള്ള നീക്കവും.
തന്റെ മകന് തെറ്റ് ചെയ്തിട്ടില്ലെന്നും ആദായ നികുതി വകുപ്പിന്റെ അന്വേഷണത്തെ ഭയക്കുന്നില്ലെന്നും പൃഥ്വിരാജിന്റെ അമ്മയും നടിയുമായ മല്ലിക സുകുമാരന് പ്രതികരിച്ചു.
എന്ഫോഴ്സ്മെന്റ് ഡയറക്ടറേറ്റിന്റെ റെയ്ഡിനും ചോദ്യം ചെയ്യലിലും പിന്നാലെ പ്രതികരിച്ച് വ്യവസായി ഗോകുലം ഗോപാലന്. ഇ ഡി ഉദ്യോഗസ്ഥര് ക്രമക്കേടുകളൊന്നും കണ്ടെത്തിയിട്ടില്ലെന്നും 'ബ്ലെസ്' ചെയ്താണ് മടങ്ങിയതെന്നും ഗോകുലം ഗോപാലന് പറഞ്ഞു. എമ്പുരാന് സിനിമയുമായി ബന്ധപ്പെട്ടതല്ല സ്വാഭാവികമായ പരിശോധന മാത്രമാണെന്നും ഗോകുലം ഗോപാലന് പറഞ്ഞു. അഞ്ച് ഇടങ്ങളിലായായിരുന്നു ഇ ഡി പരിശോധന നടത്തിയത്.
ഗോകുലം ഗ്രൂപ്പിന്റെ സ്ഥാപനങ്ങളില് നടന്ന റെയ്ഡിന് എമ്പുരാന് സിനിമയുമായി ബന്ധമില്ലെന്ന് നേരത്തെ തന്നെ എന്ഫോഴ്സ്മെന്റ് ഡയറക്ടറേറ്റ് വ്യക്തമാക്കിയിരുന്നു. ഗോകുലം ഗ്രൂപ്പ് വിദേശനാണയ വിനിമയച്ചട്ടം ലംഘിച്ചുവെന്ന് എന്ഫോഴ്സ്മെന്റ് ഡയറക്ടറേറ്റ് പറഞ്ഞു. വിവിധ സിനിമയിലടക്കം കോടികള് നിക്ഷേപിച്ചത് ചട്ടങ്ങള് ലംഘിച്ച് സ്വീകരിച്ച പണമാണെന്നാണ് ഇഡി അറിയിച്ചു.
റെയ്ഡില് ഒന്നരക്കോടി രൂപയും ചില രേഖകളും പിടിച്ചെടുത്തിട്ടുണ്ട്. ഇ ഡി റെയ്ഡ് ശനിയാഴ്ച പുലര്ച്ചയോടെയാണ് അവസാനിച്ചത്. ചെന്നൈ കോടമ്പാക്കത്തെ ഗോകുലം ചിറ്റ്സ് ആന്റ് ഫിനാന്സിലും ചെന്നൈയിലെ വീട്ടിലും കോഴിക്കോട്ടെ കോര്പറേറ്റ് ഓഫീസിലും ഗോകുലം മാളിലും ഇ.ഡി വെള്ളിയാഴ്ച റെയ്ഡ് നടത്തിയിരുന്നു. ഇതില് കോടമ്പാക്കത്തെ സ്ഥാപനത്തിലെ റെയ്ഡ് ശനിയാഴ്ച പുലര്ച്ച വരെ നീണ്ടു.
അതേസമയം രാവിലെ കോഴിക്കോട് കോര്പറേറ്റ് ഓഫീസില്വെച്ച് ഇ.ഡി ഗോകുലം ഗോപാലനെ ചോദ്യം ചെയ്തിരുന്നു. ഇതിന് പിന്നാലെ ചെന്നൈയില് ഹാജരാകാന് നോട്ടീസ് നല്കിയിരുന്നു. വൈകുന്നേരത്തോടെ ചെന്നൈയിലെത്തിയ ഗോകുലം ഗോപാലനെ അവിടെ വെച്ചും ഇ.ഡി ചോദ്യം ചെയ്തിരുന്നു. ഏഴര മണിക്കൂറോളമാണ് ചോദ്യം ചെയ്യല് നീണ്ടത്.
