നാടും നഗരവും കോവിഡ് ഭീതിയിലായിരുന്ന സമയത്തു പത്തനംതിട്ടയില് കോവിഡ് രോഗിയായ യുവതിയെ ആംബുലന്സില് പീഡിപ്പിച്ച കേസില് പ്രതിക്ക് ജീവപര്യന്തം തടവ് ശിക്ഷ. കായംകുളം സ്വദേശി നൗഫിലിനെയാണ് ജീവപര്യന്തം തടവിന് പത്തനംതിട്ട കോടതി ശിക്ഷിച്ചത്. ജീവപര്യന്തം തടവ് ശിക്ഷയ്ക്ക് പുറമെ 1,08000 രൂപ പിഴയും കോടതി വിധിച്ചു. കേസില് പ്രതി കുറ്റക്കാരനാണെന്ന് പത്തനംതിട്ട പ്രിന്സിപ്പല് സെഷന് കോടതി കണ്ടെത്തിയിരുന്നു.
ഐപിസി 366, 376, 354, 323 എന്നീ വകുപ്പുകള് പ്രകാരവും എസ്സി, എസ്ടി ആക്ട് 5എ വകുപ്പ് പ്രകാരവും പ്രതി കുറ്റക്കാരനാണെന്ന് കോടതി കണ്ടെത്തിയിരുന്നു. കായംകുളം കീരിക്കാട് തെക്ക് പനയ്ക്കച്ചിറ വീട്ടില് നൗഫല് ആരോഗ്യ വകുപ്പിന്റെ 'കനിവ്' പദ്ധതിയുടെ ഭാഗമായ ‘108’ ആംബുലന്സിന്റെ ഡ്രൈവര് ആയിരുന്നു. ഇയാള് മുന്പ് വധശ്രമക്കേസിലും പ്രതിയാണ്.
2020 സെപ്തംബര് അഞ്ചിനാണ് ആറന്മുളയില്വച്ച് യുവതി പീഡനത്തിനിരയായത്. അടൂരില്നിന്നും പന്തളത്തെ ആശുപത്രിയിലേക്ക് കൊണ്ടുപോകുന്നതിനിടെയായിരുന്നു ആക്രമണം. പ്രതി പെണ്കുട്ടിയെ ഉപദ്രവിക്കുന്നതിന് കരുതിക്കൂട്ടി ശ്രമിക്കുകയായിരുന്നു. അക്രമം നടക്കുമ്പോള് പെണ്കുട്ടിക്ക് 19 വയസായിരുന്നു. യാത്രാ റൂട്ട് മാറ്റി ആറന്മുളയിലെ ആളൊഴിഞ്ഞ ഗ്രൗണ്ടിലെത്തിച്ചാണ് പീഡിപ്പിച്ചത്.
കോവിഡ് മൂലം അവശയായിരുന്ന പെണ്കുട്ടി പീഡനത്തെ തുടര്ന്ന് ഗുരുതരാവസ്ഥയിലായി. കേസിനാവശ്യമായ തെളിവുകള് മൊബൈല് ഫോണിലൂടെ ശേഖരിച്ചാണ് പെണ്കുട്ടി പൊലീസില് പരാതി നല്കിയത്. വാര്ത്ത ശ്രദ്ധയില്പ്പെട്ട ഹൈക്കോടതി വിഷയത്തില് ഇടപെടുകയും ചെയ്തിരുന്നു. ബലാത്സംഗം, പട്ടികജാതി പീഡനം തുടങ്ങിയ വകുപ്പുകളാണ് പ്രതിക്കുമേല് ചുമത്തിയിരിക്കുന്നത്. രാജ്യത്ത് ആദ്യമായി പട്ടികജാതി/വര്ഗ പീഡന നിരോധന നിയമപ്രകാരം സാക്ഷി വിസ്താരം പൂര്ണമായും വിഡിയോ റെക്കോര്ഡ് ചെയ്യാന് ഹൈക്കോടതി ഉത്തരവിട്ട കേസുകൂടിയാണ് ഇത്.
