ഹൈബ്രിഡ് കഞ്ചാവുമായി അറസ്റ്റിലായ ഹിറ്റ് സംവിധായകര് ഖാലിദ് റഹ്മാനും അഷ്റഫ് ഹംസയ്ക്കും എതിരെ നടപടിയുണ്ടാകുമെന്ന് ഫെഫ്ക. ഖാലിദ് റഹ്മാനെയും അഷ്റഫ് ഹംസയെ സസ്പെന്ഡ് ചെയ്യുമെന്ന് ഫെഫ്ക പ്രസിഡന്റ് സിബി മലയില് പ്രതികരിച്ചു. ലഹരിയില് വലുപ്പചെറുപ്പമില്ലാതെ നടപടി സ്വീകരിക്കുമെന്നും സിബി മലയില് പറഞ്ഞു.
കഴിഞ്ഞമാസം ലഹരിയുമായി പിടികൂടിയ മേക്കപ്പ്മാനെതിരെ നടപടി എടുത്തിരുന്നുവെന്നും സിബി മലയില് പറഞ്ഞു. ഹൈബ്രിഡ് കഞ്ചാവുമായി മൂന്ന് പേരാണ് കൊച്ചിയില് അറസ്റ്റിലായത്. സംവിധായകരായ ഖാലിദ് റഹ്മാന്, അഷ്റഫ് ഹംസ എന്നിവര്ക്ക് പുറമെ ഷാലിഫ് മുഹമ്മദ് എന്ന ആളും അറസ്റ്റിലായി. അര്ധരാത്രി എക്സൈസ് നടത്തിയ പരിശോധനയിലാണ് സംവിധായകരെ അടക്കം പിടികൂടിയത്. സംവിധായകനും ഛായാഗ്രാഹകനുമായ സമീര് താഹിറിന്റെ ഫ്ളാറ്റില് വച്ചാല് ഹൈബ്രിഡ് കഞ്ചാവ് ഉപയോഗിക്കാന് തുടങ്ങുന്നതിനിടെ സംവിധായകര് പിടിയിലായത്. രഹസ്യ വിവരത്തെ തുടര്ന്നായിരുന്നു പരിശോധന.
1.6 ഗ്രാം ഹൈബ്രിഡ് കഞ്ചാവാണ് ഇവരില് നിന്ന് കണ്ടെടുത്തത്. അളവ് കുറവായതിനാല് അറസ്റ്റിന് ശേഷം ഇവരെ സ്റ്റേഷന് ജാമ്യത്തില് വിട്ടയച്ചു. ഹൈബ്രിഡ് കഞ്ചാവ് യുവ സംവിധായകര്ക്ക് കിട്ടിയ വഴി വിശദമായി അന്വേഷിക്കുമെന്ന് എക്സൈസ് വ്യക്തമാക്കി. രഹസ്യ വിവരത്തിന്റെ അടിസ്ഥാനത്തിലാണ് ഫ്ലാറ്റില് റെയ്ഡ് നടത്തിയത് എന്നും എറണാകുളം എക്സൈസ് സ്പെഷ്യല് സ്ക്വാഡ് ഇന്സ്പെക്ടര് പ്രമോദ് കെപി പറഞ്ഞു.
ആലപ്പുഴ ജിംഖാന, ഉണ്ട, തല്ലുമാല, അനുരാഗ കരിക്കിന് വെള്ളം തുടങ്ങിയ സിനിമകളുടെ സംവിധായകനാണ് പിടിയിലായ ഖാലിദ്. തമാശ, ഭീമന്റെ വഴി, സുലൈഖ മന്സില് തുടങ്ങിയ സിനിമകളുടെ സംവിധായകനാണ് അഷ്റഫ് ഹംസ. കുറേക്കാലമായി സിനിമാലോകത്തു ചര്ച്ചാ വിഷയമായ 'മട്ടാഞ്ചേരി മാഫിയ' ചേരിയാണ് ഇതിനെല്ലാം പിന്നിലെന്ന് സിനിമാലോകത്തു തന്നെ സംസാരമുണ്ട്.
