കഞ്ചാവ് വലിക്കും, കള്ള് കുടിക്കും, ലോക്കറ്റിലുള്ളത് പുലിപ്പല്ലാണോയെന്ന് അറിയില്ല-വേടന്റെ പ്രതികരണം
കഞ്ചാവ് കേസില് അറസ്റ്റിലായ റാപ്പ് ഗായകന് വേടന് എന്നറിയപ്പെടുന്ന ഹിരണ്ദാസ് മുരളിയെ പുലിപ്പല്ല് കൈവശം വെച്ച കേസില് പെരുമ്പാവൂര് കോടതിയില് ഹാജരാക്കും. മൃഗവേട്ടയടക്കം ജാമ്യമില്ലാ കുറ്റങ്ങള് ചുമത്തിയാണ് വേടനെതിരെ വനം വകുപ്പ് നടപടി. വേടനെതിരെ വനംവകുപ്പ് ഏഴു വര്ഷംവരെ തടവ് ലഭിക്കുന്ന കുറ്റമാണ് ചുമത്തിയത്.
അതേസമയം താന് കഞ്ചാവും വലിക്കുകയും കളള് കുടിക്കുകയും ചെയ്യുന്ന ആളാണെന്ന് കോടതിയിലേക്ക് കൊണ്ടുപോകുന്നതിന് മുന്പ് വേടന് മാധ്യമങ്ങളോട് പ്രതികരിച്ചു. ഇക്കാര്യം എല്ലാവര്ക്കും അറിയാമെന്നും വേടന് പറഞ്ഞു. രാസലഹരി ഉപയോഗിക്കാറുണ്ടോ എന്ന മാധ്യമപ്രവര്ത്തകരുടെ ചോദ്യത്തിന് ഇല്ലെന്നായിരുന്നു വേടന്റെ മറുപടി. തന്റെ മാലയില് ലോക്കറ്റായി ഉപയോഗിച്ചിരിക്കുന്ന പുലിപ്പല്ല് യഥാര്ത്ഥ പുലിപ്പല്ലാണോയെന്ന് ഇപ്പോഴും അറിയില്ലെന്നും വേടന് പറഞ്ഞു.
പുലിപ്പല്ല് കൈവശം വെച്ച കേസില് നേരത്തേ വേടനെതിരേ ജാമ്യമില്ലാ വകുപ്പ് പ്രകാരം വനംവകുപ്പ് കേസെടുത്തിരുന്നു. തമിഴ്നാട്ടിലെ ഒരു ആരാധകനാണ് തനിക്ക് പുലിപ്പല്ല് സമ്മാനിച്ചതെന്നാണ് വേടന്റെ മൊഴി. നേരത്തേ, തായ്ലാന്ഡില് നിന്നാണ് ഇത് ലഭിച്ചതെന്ന് വേടന് മൊഴി നല്കിയതായി റിപ്പോര്ട്ടുകളുണ്ടായിരുന്നു.
വേടനും സുഹൃത്തുക്കളും താമസിച്ചിരുന്ന ഫ്ലാറ്റില് തിങ്കളാഴ്ച പോലീസ് നടത്തിയ പരിശോധനയില് ആറു ഗ്രാം കഞ്ചാവും ഒന്പതര ലക്ഷം രൂപയുമായിരുന്നു കണ്ടെടുത്തത്. ഇവര്ക്ക് പിന്നീട് ജാമ്യം ലഭിച്ചെങ്കിലും, വേടന് അണിഞ്ഞിരുന്ന മാലയിലെ ലോക്കറ്റ് പുലിപ്പല്ലാണെന്ന് കണ്ടെത്തിയതോടെ വനം-വന്യജീവി വകുപ്പ് കേസെടുത്ത് രാത്രിയോടെ അറസ്റ്റു രേഖപ്പെടുത്തുകയായിരുന്നു.
