പ്രധാനമന്ത്രി കീര്‍ സ്റ്റാര്‍മറുമായി ബന്ധപ്പെട്ട വസതികള്‍ക്ക് തീയിട്ട സംഭവത്തില്‍ ഒരാള്‍ക്കെതിരെ പൊലീസ് കുറ്റപത്രം സമര്‍പ്പിച്ചു. 21 വയസുകാരനായ യുവാവിനെതിരെയാണ് കുറ്റം ചുമത്തിയിരിക്കുന്നതെന്ന് മെട്രോപൊളിറ്റന്‍ പൊലീസ് പറഞ്ഞു. യുക്രൈന്‍ പൗരനായ റോമന്‍ ലാവ്‌റിനോവിച്ചിനെതിരെ ജീവന്‍ അപകടപ്പെടുത്താന്‍ ഉദ്ദേശിച്ച് തീയിട്ടതിനാണ് കേസെടുത്തത്.
ചൊവ്വാഴ്ച പുലര്‍ച്ചെ ഇയാളെ തെക്കു കിഴക്കന്‍ ലണ്ടനിലെ ഡിസെന്‍ഹാമിലെ ഒരു വീട്ടില്‍വച്ചാണ് അറസ്റ്റ് ചെയ്തത്. പ്രതിയെ വെള്ളിയാഴ്ച വെസ്റ്റ്മിന്‍സ്റ്റര്‍ മജിസ്‌ട്രേറ്റ് കോടതിയില്‍ ഹാജരാക്കും. വടക്കന്‍ ലണ്ടനിലെ കെന്റിഷ് ടൗണില്‍ ഒരു വാഹനത്തിന് തീപിടിച്ചത്. പ്രധാനമന്ത്രിയുടെ അതേ തെരുവിലെ സ്വകാര്യവീട്ടില്‍ തീപിടിച്ചത്, വടക്കുപടിഞ്ഞാറന്‍ ലണ്ടനില്‍ അദ്ദേഹം മുമ്പു താമസിച്ചിരുന്ന വിലാസത്തില്‍ തീപിടിത്തം നടന്നത് എന്നിങ്ങനെ മൂന്നു കാര്യങ്ങളിലാണ് കുറ്റങ്ങള്‍ ചുമത്തിയിരിക്കുന്നത്. തീവ്രവാദ വിരുദ്ധ പൊലീസാണ് അന്വേഷണം നടത്തുന്നത്.
തിങ്കളാഴ്ച പുലര്‍ച്ചെ വടക്കന്‍ ലണ്ടനിലെ കെന്റിഷ് ടൗണിലുള്ള പ്രധാനമന്ത്രിയുടെ സ്വകാര്യ വീട്ടിലുണ്ടായ തീപിടിത്തത്തില്‍ അടിയന്തര സേവനങ്ങളുടെ സഹായം തേടിയിരുന്നു. വീടിന്റെ പ്രവേശന കവാടത്തിനാണ് തീപിടിച്ചത്. ആര്‍ക്കും പരിക്കില്ല.
ഞായറാഴ്ചയും സമാന സംഭവം നടന്നു. രാവിലെ മൂന്നു മണിക്ക് ഇസ്ലിംഗ്ടണില്‍ ഫ്‌ളാറ്റുകളായി മാറ്റിയ വീടിന്റെ മുന്‍വാതിലില്‍ ഉണ്ടായ ചെറിയ തീപിടിത്തത്തിലും അടിയന്തര സഹായം തേടി. പ്രധാനമന്ത്രിയുമായി ബന്ധപ്പെട്ട സ്ഥലങ്ങളിലുണ്ടായ അപകടമായതിനാലാണ് തീവ്രവാദ വിരുദ്ധ പൊലീസ് അന്വേഷിക്കുന്നത്.
