ബിഷപ് ഫ്രാങ്കോക്കെതിരെ സമരം നയിച്ച സിസ്റ്റര് അനുപമ സഭാവസ്ത്രം ഉപേക്ഷിച്ചു; ഐടി സ്ഥാപനത്തില് ജോലിക്ക് കയറി
പീഡന കേസില് ജലന്ധര് മുന് ബിഷപ് ഡോ. ഫ്രാങ്കോ മുളയ്ക്കലിനെതിരെ നടപടി ആവശ്യപ്പെട്ടുള്ള സമരത്തിനു നേതൃത്വം നല്കിയ സിസ്റ്റര് അനുപമ സഭാവസ്ത്രം ഉപേക്ഷിച്ചു. ജലന്ധര് രൂപതയുടെ കീഴില് കോട്ടയം കുറവിലങ്ങാട്ടെ സന്യാസമഠത്തിലായിരുന്ന അനുപമ ഇപ്പോള് പള്ളിപ്പുറം ഇന്ഫോപാര്ക്കിലെ ഐടി സ്ഥാപനത്തില് ജോലി ചെയ്യുകയാണ്.
ഒന്നര മാസം മുന്പാണ് അനുപമ മഠം വിട്ട് ആലപ്പുഴ പള്ളിപ്പുറത്തെ വീട്ടിലെത്തിയത്. എംഎസ്ഡബ്ല്യു ബിരുദധാരിയായ അനുപമ നിലവില് വീടിനു സമീപത്തെ ഇന്ഫോപാര്ക്കിലെ ഐടി സ്ഥാപനത്തില് ഡേറ്റ എന്ട്രി ഓപ്പറേറ്ററായി ജോലി ചെയ്യുകയാണെന്നു ബന്ധുക്കള് അറിയിച്ചു. അനുപമയുടെ പ്രതികരണം ലഭ്യമായില്ല. സിസ്റ്റര് അനുപമയെക്കൂടാതെ മറ്റു രണ്ടു സിസ്റ്റര്മാര്കൂടി കൂടി മഠം വിട്ടതായി റിപ്പോര്ട്ടുകളുണ്ട്.
കത്തോലിക്ക സഭയെ പിടിച്ചുലച്ച കേസായിരുന്നു ബിഷപ് ഫ്രാങ്കോ മുളയ്ക്കലിനെതിരായ ബലാത്സംഗ ആരോപണം. 2014 മുതല് 2016 വരെയുള്ള കാലയളവില് 13 തവണ ബിഷപ്പ് ഫ്രാങ്കോ ബലാത്സംഗം ചെയ്തുവെന്നായിരുന്നു മഠത്തിലെ കന്യാസ്ത്രീയുടെ പരാതി. കേസില് പരാതി നല്കിയിട്ടും നടപടി ഇല്ലാതെ വന്നതോടെയാണ് അനുപമയുടെ നേതൃത്വത്തില് മറ്റു കന്യാസ്ത്രീകള് സഹപ്രവര്ത്തകയ്ക്കായി പരസ്യമായി സമരത്തിനിറങ്ങിയത്.
2018 ജൂണില് റജിസ്റ്റര് ചെയ്ത കേസില് ഡോ. ഫ്രാങ്കോ 2018 സെപ്റ്റംബറില് അറസ്റ്റിലായി. 105 ദിവസം നീണ്ട വിചാരണ നടപടികള്ക്ക് ശേഷം കോട്ടയം ജില്ല അഡീഷണല് സെഷന്സ് കോടതി 2022 ജനുവരി 14 ന് ഫ്രാങ്കോയെ കുറ്റവിമുക്തനാക്കിയിരുന്നു.
