എയര് ഇന്ത്യയുടെ സാന്ഫ്രാന്സിസ്കോ വിമാനത്തില് സാങ്കേതിക തകരാര് യാത്രക്കാരെ പുറത്തിറക്കി
സാന്ഫ്രാന്സിസ്കോയില് നിന്ന് കൊല്ക്കത്ത വഴി മുംബൈയിലേക്ക് വരികയായിരുന്ന എയര് ഇന്ത്യ വിമാനത്തില് സാങ്കേതിക തകരാര്. കൊല്ക്കത്ത നേതാജി സുബാഷ് ചന്ദ്രബോസ് അന്താരാഷ്ട്ര വിമാനത്താവളത്തില് എത്തിയപ്പോള് യാത്രക്കാരെ മുഴുവന് പുറത്തിറക്കി വിമാനം പരിശോധിച്ചു. ചൊവ്വാഴ്ച പുലര്ച്ചെയായിരുന്നു സംഭവം. വിമാനത്തിന്റെ ഇടതു വശത്തെ എഞ്ചിനില് സാങ്കേതിക തകരാറുകളുണ്ടായിരുന്നു എന്നാണ് റിപ്പോര്ട്ട്.
സാന്ഫ്രാന്സിസ്കോയില് നിന്ന് കൊല്ക്കത്തയിലെത്തിയ വിമാനത്തിന്റെ മുംബൈയിലേക്കുള്ള തുടര് യാത്ര പ്രശ്നങ്ങളെ തുടര്ന്ന് വൈകിയതായി വാര്ത്താ ഏജന്സി റിപ്പോര്ട്ട് ചെയ്തു. സാന്ഫ്രാന്സിസ്കോയില് നിന്ന് കൃത്യ സമയത്ത് തന്നെ പുറപ്പെട്ട എ.ഐ 180 വിമാനം പുലര്ച്ചെ 12.45നാണ് കൊല്ക്കത്ത വിമാനത്താവളത്തിലെത്തിയത്. തുടര്ന്ന് ഇടതു വശത്തെ എഞ്ചിനില് സാങ്കേതിക തകരാര് കണ്ടെത്തി.
ഏതാനും മണിക്കൂറുകള്ക്ക് ശേഷം പുലര്ച്ചെ 5.20ഓടെ എല്ലാ യാത്രക്കാരോടും പുറത്തിറങ്ങാന് ആവശ്യപ്പെടുകയായിരുന്നു. വിമാനത്തിന്റെ സുരക്ഷ കണക്കിലെടുത്താണ് ഇത്തരമൊരു തീരുമാനമെടുത്തതെന്ന് ക്യാപ്റ്റന് യാത്രക്കാരെ അറിയിക്കുകയും ചെയ്തു. ജീവനക്കാര് വിമാനം പരിശോധിക്കുന്നതും പുറത്തുവന്ന വീഡിയോ ദൃശ്യങ്ങളില് കാണാം. കഴിഞ്ഞ ദിവസം എയര് ഇന്ത്യയുടെ രണ്ട് വിമാനങ്ങളില് സാങ്കേതിക തകരാര് സംശയിച്ച് തിരിച്ചിറക്കിയിരുന്നു.
