യുകെയിലെ ബര്മ്മിങ്ഹാമില് നിന്ന് വിമാനത്തില് കൊച്ചിയിലെത്താന് മലയാളി കുടുംബത്തിന് വേണ്ടിവന്നത് 63 മണിക്കൂറിലേറെ. ശനിയാഴ്ച യുകെ സമയം രാത്രി 8.15നാണ് മൂവാറ്റുപുഴ തൃക്കളത്തൂര് സ്വദേശിയായ ജിജോ ഡാനിയേലും കുടുംബവും എയര്ഇന്ത്യ വിമാനത്തില് ഡല്ഹിയിലേക്ക് പുറപ്പെട്ടത്. ഭാര്യ ബിന്ദുവും മൂത്തമകന് ജോവനും ഒപ്പമുണ്ടായിരുന്നു. ഞായര് രാവിലെ 10.55ന് ന്യൂഡല്ഹിയിലെത്തി അവിടെ നിന്ന് കണക്ഷന് ഫ്ളൈറ്റില് കൊച്ചിയിലേക്ക് വരാനായിരുന്നു പദ്ധതി, ജിജോയും കുടുംബവും കൊച്ചിയിലെത്തിയത് ഉച്ചയ്ക്ക് 12 നാണ്.
ഞായര് രാവിലെ 6ന് ഇവര് സഞ്ചരിച്ച വിമാനം സൗദിയുടെ മുകളില് പറക്കുമ്പോള് ബോംബു ഭീഷണിയുണ്ടായി. വിമാനത്തിന്റെ ശുചിമുറിയില് ടിഷ്യു പേപ്പറില് എഴുതിയ നിലയിലായിരുന്നു ഭീഷണി. വിമാനം അടിയന്തരമായി റിയാദില് ഇറക്കി. കാബിന് ബാഗേജു പോലും എടുപ്പിക്കാതെ എല്ലാവരേയും വൈകീട്ട് വരെ ടെര്മിനലില് ഇരുത്തി. ബോംബ് പരാശോധന പൂര്ത്തിയാക്കി രാത്രിയോടെ എല്ലാവരേയും ഹോട്ടലിലേക്ക് മാറ്റി.
തിങ്കള് രാവിലെ 5 മണിയോടെ വിമാനത്തവളത്തിലെത്തിച്ചെങ്കിലും ബാഗുകളെല്ലാം ഒരിക്കല്കൂടി പരിശോധിച്ചാണ് വിമാനം പുറപ്പെട്ടത്. ഡല്ഹിയിലെത്തിയത് രാത്രി 7.10ന് രാത്രി 8.10നായിരുന്നു കണക്ഷന് ഫ്ളൈറ്റ്. നടപടികള് പൂര്ത്തിയാക്കിയപ്പോഴേക്കും വിമാനം പുറപ്പെട്ടിരുന്നു. വീണ്ടും ഹോട്ടല് താമസം ഏര്പ്പെടുത്തി തന്ന എയര് ഇന്ത്യ ചൊവ്വാഴ്ച രാവിലെ 5നുള്ള കൊച്ചി വിമാനത്തില് കയറ്റിവിട്ടു. രാവിലെ 8.10ന് കൊച്ചി വിമാനത്താവളത്തിന് മുകളിലെത്തിയെങ്കിലും മോശം കാലാവസ്ഥ മൂലം ബംഗളൂരുവിലേക്ക് കൊണ്ടുയി.ഒടുവില് കൊച്ചിയിലേക്കെത്തിയപ്പോള് 12 മണിയായി. 63 മണിക്കൂര് 45 മിനിറ്റ് നീണ്ട ദുരിത യാത്രയില് കുടുംബം വലഞ്ഞു.
