വിവാദങ്ങള്ക്കൊടുവില് നടി വിന്സിയോട് പരസ്യമായി മാപ്പ് പറഞ്ഞ് ഷൈന് ടോം ചാക്കോ. സൂത്രവാക്യം സിനിമയുടെ പ്രമോഷനോട് അനുബന്ധിച്ച് നടത്തിയ വാര്ത്താ സമ്മേളനത്തിലായിരുന്നു ഷൈന് ടോം ചാക്കോയുടെ മാപ്പ് പറച്ചില്. വിവാദങ്ങള്ക്ക് ശേഷം ഇരുവരും ഒരുമിച്ച് പങ്കെടുക്കുന്ന പരിപാടിയാണ് ഇത്. സൂത്രവാക്യം സിനിമയുടെ ചിത്രീകരണത്തിനിടെ ഷൈന് ടോം ചാക്കോ ലഹരി ഉപയോഗിച്ച് തന്നോട് മോശമായി പെരുമാറി എന്ന വിന്സി അലോഷ്യസിന്റെ പരാതി വന് വിവാദമായിരുന്നു.
തന്റെ ഭാഗത്ത് നിന്നും എന്തെങ്കിലും പ്രശ്നം ഉണ്ടായിട്ടുണ്ടെങ്കില് ക്ഷമ ചോദിക്കുന്നുവെന്ന് വാര്ത്ത സമ്മേളനത്തില് ഷൈന് പറഞ്ഞു. ഒന്നും മനപ്പൂര്വ്വം ചെയ്തതല്ല, പല വാക്കുകളും തമാശയായി പറഞ്ഞതാണ് എന്നും ഷൈന് ടോം ചാക്കോ പറഞ്ഞു.
അതേസമയം താന് ആരാധിച്ച വ്യക്തിയില് നിന്ന് അപ്രതീക്ഷിതമായ അനുഭവം ഉണ്ടായത് കൊണ്ടാണ് പരാതിയുമായി എത്തിയത് എന്നും ഷൈനിന്റെ കുടുംബത്തെ വേദനപ്പെടുത്തിയതില് ദുഃഖമെന്നും വിന്സി വ്യക്തമാക്കി. പ്രശ്നങ്ങള് പരസ്പരം പറഞ്ഞു തീര്ത്തെന്നും ഇരുവരും മാധ്യമങ്ങളോട് വ്യക്തമാക്കി.
സൂത്രവാക്യം എന്ന സിനിമയുടെ സെറ്റില് വെച്ച് ഷൈന് മോശമായി പെരുമാറിയെന്നായിരുന്നു വിന്സിയുടെ പരാതി. സംഭവത്തില് അന്വേഷണവുമായി എക്സൈസ് അടക്കം രംഗത്തെത്തി. നടിയുടെ വെളിപ്പെടുത്തലിനെ കുറിച്ച് സ്റ്റേറ്റ് ഇന്റലിജന്സും അന്വേഷണം തുടങ്ങിയിരുന്നു. വിന്സിയില് നിന്ന് പരാതി വാങ്ങി കേസെടുക്കാന് പൊലീസും ശ്രമം ആരംഭിച്ചിരുന്നു. എന്നാല് വിഷയം വിവാദമായതോടെ പരാതി നല്കുന്നതില് നിന്നും വിന്സി പിന്മാറുകയായിരുന്നു.
