സന്ദര്‍ലാന്‍ഡില്‍ കെയര്‍ ഹോമിലേയ്ക്ക് കാര്‍ ഇടിച്ചു കയറി അന്തേവാസികളായ രണ്ട് വയോധികരായ സ്ത്രീകള്‍ കൊല്ലപ്പെട്ടു. 90 ഉം 80 വയസുള്ള രണ്ട് അന്തേവാസികളാണ് ദാരുണമായ ദുരന്തത്തിന് ഇരയായത്. ഹൈ ക്ലിഫ് കെയര്‍ ഹോമില്‍ ആണ് രാജ്യത്തെ നടുക്കിയ ദുരന്തം നടന്നത്. അപകടത്തില്‍ പരുക്ക് പറ്റി എട്ട് പേരെ ആശുപത്രിയില്‍ പ്രവേശിപ്പിച്ചു.
പോലീസ് പിന്തുടര്‍ന്നതിനെ തുടര്‍ന്ന് അമിത വേഗത്തില്‍ ഓടിച്ച കാര്‍ ആണ് ഇടിച്ചുകയറിയത്. മോഷ്ടിക്കപ്പെട്ടതായി സംശയിക്കുന്ന ഒരു ബിഎംഡബ്ല്യു കാറാണ് അപകടത്തിന് കാരണമായത്. അപകടം നടന്ന ഉടനെ 21 വയസ്സുള്ള രണ്ട് പേരെ പോലീസ് അറസ്റ്റ് ചെയ്തിരുന്നു. ഇവരുടെ മേല്‍ നരഹത്യ കൂടി ചുമത്തിയതായി പോലീസ് അറിയിച്ചു.
അപകടത്തില്‍ പരുക്കേറ്റ് ആശുപത്രിയില്‍ പ്രവേശിപ്പിച്ചവരുടെ പരുക്ക് ഗുരുതരമല്ലെന്ന റിപ്പോര്‍ട്ടുകള്‍ പുറത്തു വരുന്നുണ്ട്. അപകടത്തില്‍ പെട്ട കാര്‍ ന്യൂ കാസിലിലെ ഫെന്‍ ഹാം പ്രദേശത്തുനിന്ന് മോഷ്ടിക്കപ്പെട്ടതാണെന്ന് പോലീസ് പിന്നീട് അറിയിച്ചു.
