നടന് കലാഭവന് നവാസിന് അന്ത്യാഞ്ജലി അര്പ്പിച്ചു സിനിമാ ലോകം. ചോറ്റാനിക്കരയിലെ ഹോട്ടലില് കഴിഞ്ഞ ദിവസം മരിച്ച നിലയില് കണ്ടെത്തിയ നവാസിന്റെ പോസ്റ്റുമോര്ട്ടം ഇന്ന് നടക്കും. പോസ്റ്റ്മോര്ട്ടത്തിന് ശേഷം ആലുവ ചൂണ്ടിയിലുള്ള വീട്ടിലേക്ക് മൃതദേഹം കൊണ്ടുവരും. ഇവിടെ ബന്ധുക്കള്ക്ക് മാത്രം അന്ത്യാഞ്ജലി അര്പ്പിക്കാന് സൗകര്യം ഒരുക്കും. നാല് മണിയോടെ ആലുവ സെന്ട്രല് ജുമാ മസ്ജിദിലേക്ക് മൃതശരീരം എത്തിക്കും. തുടര്ന്ന് അഞ്ച് മണിയോടെ സെന്ട്രല് ജുമാമസ്ജിദ് ഖബര്സ്ഥാനില് സംസ്കാരം.
വെള്ളിയാഴ്ച രാത്രിയാണ് ചോറ്റാനിക്കരയിലെ ഷൂട്ടിംഗ് സെറ്റില് നിന്ന് ഹോട്ടല് മുറിയില് എത്തിയ നവാസിനെ മരിച്ച നിലയില് കാണുന്നത്. ഹോട്ടല് മുറിയില് നിന്ന് മിനിറ്റുകള്ക്കുള്ളില് ആശുപത്രിയില് എത്തിച്ചെങ്കിലും ജീവന് രക്ഷിക്കാനായില്ല. ഒരു ഇടവേളക്ക് ശേഷം അദ്ദേഹം സിനിമയില് വീണ്ടും സജീവമാകുന്നതിനിടെയാണ് അപ്രതീക്ഷിത വിയോഗം.
പ്രകമ്പനം സിനിമയുടെ ചിത്രീകരണത്തിന് ശേഷം ഹോട്ടലില് മടങ്ങിയെത്തിയപ്പോഴാണ് നവാസിന്റെ വിയോഗം. ഇന്നും നാളെയും തന്റെ ഷൂട്ടിംഗ് ഇല്ലാത്തതിനാല് വീട്ടിലേക്ക് മടങ്ങാനുള്ള തയ്യാറെടുപ്പിലായിരുന്നു നവാസ്.
കലാഭവനിലൂടെ മിമിക്രി രംഗത്തേക്ക് കടന്നുവന്ന നവാസ്, വൈകാതെ നടനും ഗായനുമെന്ന നിലയില് ശ്രദ്ധിക്കപ്പെട്ടിരുന്നു.ടെലിവിഷന് ഷോകളിലൂടെ മലയാളിയുടെ വീടുകങ്ങളില് സുപരിചിതനായി മാറിയ നവാസ് 1995ല് ചൈതന്യം എന്ന ചിത്രത്തിലൂടെ വെള്ളിത്തരയിലെത്തി. മാട്ടുപ്പെട്ടി മച്ചാന്, തില്ലാന തില്ലാന, മായാജാലം, ജൂനിയര് മാന്ഡ്രേക്ക്, മൈ ഡിയര് കരടി, ചട്ടമ്പി നാട്, ചക്കരമുത്ത് മേരാം നാം ഷാജി തുടങ്ങി നിരവധി ചിത്രങ്ങളില് വേഷമിട്ടു. അഭിനയിച്ചതിലേറെയും ഹാസ്യ കഥാപാത്രങ്ങള്.
ഈ വര്ഷം പുറത്തിറങ്ങിയ ഡിറ്റക്ടീവ് ഉജ്ജ്വലനിലും മികച്ച പ്രകടനമാണ് പ്രേക്ഷകര് കണ്ടത്. ടെലിവിഷന് കോമഡി പരിപാടികളില് ജഡ്ജസിന്റെ റോളിലെത്തിയിരുന്ന നവാസ് അവിടെയും പ്രേക്ഷകനെ കയ്യിലെടുത്തു. സഹോദരന് നിയാസ് ബക്കറിനൊപ്പം ആരംഭിച്ച കൊച്ചിന് ആര്ട്സ് മിമിക്രി ട്രൂപ്പിലൂടെ സ്റ്റേജ് ഷോകളില് സജീവ സാന്നിധ്യമായിരുന്നു. ഗൗരവമുള്ള കഥാപാത്രങ്ങളിലൂടെ സിനിമയിലേക്ക് മടങ്ങിവരാനുളള ശ്രമങ്ങള്ക്കിടെയാണ് നവാസിന്റെ അപ്രതീക്ഷിത വിയോഗം. അഭിനേതാവ് അബൂബക്കറിന്റെ മകനാണ് നവാസ്. നടി രഹ്നയാണ് ഭാര്യ. മൂന്നു മക്കള്.
