ബ്രിട്ടനില് പഠനത്തിനുള്ള ചെലവും വര്ധിപ്പിക്കാന് നീക്കം നടക്കുന്നു. പണപ്പെരുപ്പവുമായി ബന്ധിപ്പിച്ച് ട്യൂഷന് ഫീസ് ഓരോ വര്ഷവും വര്ധിപ്പിച്ചാല് യൂണിവേഴ്സിറ്റി വിദ്യാര്ത്ഥികള്ക്ക് ചെലവേറുമെന്നതാണ് അവസ്ഥ.
ഇങ്ങനെ സംഭവിച്ചാല് അടുത്ത വര്ഷത്തോടെ ഫീസ് 250 പൗണ്ടിലേറെ വര്ദ്ധിച്ച് 9800 പൗണ്ടിന് സമീപമെത്തും. 2027-ഓടെ ഇത് 10,000 പൗണ്ട് കടക്കാനും സാധ്യതയുണ്ട്. അധിക ഫണ്ടിംഗ് ലഭിച്ചില്ലെങ്കില് പല യൂണിവേഴ്സിറ്റികളും പൊട്ടി പാപ്പരാകുമെന്ന നിലയിലാണെന്നത് ആശങ്ക ഉയര്ത്തുന്നതിനിടെയാണ് ഈ നീക്കം.
ഓഫീസ് ഫോര് ബജറ്റ് റെസ്പോണ്സിബിലിറ്റിയുടെ പണപ്പെരുപ്പ പ്രവചനത്തിന് ആനുപാതികമായി ഓരോ അക്കാഡമിക് വര്ഷത്തിന്റെ തുടക്കത്തിലും ഫീസ് വര്ദ്ധിപ്പിക്കാനാണ് എഡ്യുക്കേഷന് ഡിപ്പാര്ട്ട്മെന്റ് ആലോചിക്കുന്നതെന്ന് ദി ഐ പേപ്പര് റിപ്പോര്ട്ട് ചെയ്യുന്നു.
കഴിഞ്ഞ നവംബറിലാണ് എഡ്യുക്കേഷന് സെക്രട്ടറി ബ്രിഡ്ജെറ്റ് ഫിലിപ്സണ് ട്യൂഷന് ഫീസ് വര്ദ്ധിപ്പിച്ചത്. 9250 പൗണ്ടില് നിന്നും 9535 പൗണ്ടിലേക്കാണ് ഫീസ് ഉയര്ത്തിയത്. ഓട്ടം സീസണില് പഠനം ആരംഭിക്കുന്ന വിദ്യാര്ത്ഥികള്ക്ക് ഈ വര്ധന അനുഭവപ്പെടും.
അതേസമയം പണപ്പെരുപ്പത്തിന് ആനുപാതികമായി ഫീസ് ഉയര്ത്തിയാല് 2.7 ശതമാനം വര്ധന നേരിടും. ഇതുവഴി ഫീസ് 9792 പൗണ്ടിലെത്തും. പാര്ലമെന്റിന്റെ ഇരുസഭകളും അംഗീകരിച്ചാലാണ് ഫീസ് വര്ധനയ്ക്കുള്ള നിയമനിര്മ്മാണം പൂര്ത്തിയാകുക.
