ലൈംഗികാരോപണങ്ങള്: രാഹുല് മാങ്കൂട്ടത്തിലിനെ കോണ്ഗ്രസില് നിന്ന് സസ്പെന്ഡ് ചെയ്തു; എംഎല്എ ആയി തുടരും
തിരുവനന്തപുരം: ലൈംഗികാരോപണങ്ങള് നേരിടുന്ന രാഹുല് മാങ്കൂട്ടത്തിലിനെ കോണ്ഗ്രസില് നിന്ന് സസ്പെന്ഡ് ചെയ്തു. അതേ സമയം എംഎല്എയായി തുടരും. പാര്ട്ടിയുടെ പ്രാഥമികാംഗത്വത്തില് നിന്നാണ് സസ്പെന്ഷന്. ആറുമാസത്തേയ്ക്കാണ് സസ്പെന്ഷന് എംഎല്എ സ്ഥാനത്ത് നിന്ന് രാജിവെക്കേണ്ടതില്ല എന്ന നിലപാടിലാണ് പാര്ട്ടി.
രാഹുലിനെതിരേ ഉയര്ന്ന ആരോപണങ്ങളില് പാര്ട്ടി അന്വേഷണം ഉണ്ടായേക്കില്ല. നടപടി സസ്പെന്ഷനില് മാത്രമായി ഒതുങ്ങും. ഇനിമുതല് പാര്ട്ടിയുടേയോ മുന്നണിയുടേയോ പാര്ലമെന്ററി പാര്ട്ടി യോഗത്തില് രാഹുല് മാങ്കൂട്ടത്തില് അംഗമായിരിക്കില്ല. എംഎല്എ സ്ഥാനം പെട്ടെന്ന് രാജിവെപ്പിച്ചാല് വീണ്ടുമൊരു ഉപതിരഞ്ഞെടുപ്പ് സാധ്യത മുമ്പില് കണ്ടാണ് പാര്ട്ടി നിലപാട് എന്നാണ് സൂചന. നിയമസഭാ സമ്മേളനങ്ങളില് രാഹുല് പാര്ലമെന്ററി പാര്ട്ടിയുടെ ഭാഗമായി ഉണ്ടാകില്ല.
ലൈംഗികാരോപണത്തില് കുരുങ്ങിയതിന് പിന്നാലെ രാഹുല് മാങ്കൂട്ടത്തിലിനെ കോണ്ഗ്രസിലെ മുതിര്ന്നനേതാക്കളെല്ലാം കൈവിട്ടിരുന്നു. ഞായറാഴ്ച വനിതാനേതാക്കളും പരസ്യമായി രംഗത്തെത്തിയതോടെ എംഎല്എസ്ഥാനം രാജിവെക്കാന് രാഹുലിനുമേല് സമ്മര്ദമേറുകയായിരുന്നു.
രാഹുല് ഒരുനിമിഷംമുന്പ് രാജിവെച്ചാല് അത്രയും നല്ലതെന്ന് ഉമാ തോമസ് എംഎല്എയും മുഖ്യധാരാഷ്ട്രീയത്തില് നിന്ന് മാറിനില്ക്കണമെന്ന് ഷാനിമോള് ഉസ്മാനും പറഞ്ഞു. പരാതികള് പാര്ട്ടിയുടെ പ്രതിച്ഛായയെ ബാധിക്കുമെന്ന് പ്രവര്ത്തകസമിതിയംഗം രമേശ് ചെന്നിത്തല വ്യക്തമാക്കിയപ്പോള് അടിയന്തരമായി രാജിവെക്കണമെന്നായിരുന്നു വി.എം. സുധീരന്റെ ആവശ്യം. വി.ഡി. സതീശനും കടുത്ത എതിര്പ്പിലാണ്. ഉചിതമായ സമയത്ത് ഉചിതമായ തീരുമാനമുണ്ടാകുമെന്ന് കെപിസിസി അധ്യക്ഷന്സണ്ണി ജോസഫും വ്യക്തമാക്കി. ഇവിടെത്തന്നെ തീരുമാനമെടുക്കാനായിരുന്നു ഹൈക്കമാന്ഡിന്റെ നിര്ദേശം.
രാഹുല് രാജിവെച്ചാല് പാലക്കാട് വീണ്ടും ഉപതെരഞ്ഞെടുപ്പ് വരും എന്ന കാര്യത്തെ മറയാക്കി രക്ഷപ്പെടുത്താനുള്ള ശ്രമമാണ് ഇപ്പോള് നടക്കുന്നത്.
രാഹുല് രാജിവെക്കുമെന്ന അഭ്യൂഹങ്ങളായിരുന്നു കഴിഞ്ഞ ദിവസം പുറത്തുവന്നത്. എന്നാല് പ്രതിരോധിച്ച് നില്ക്കാനായിരുന്നു രാഹുലിന്റെ ശ്രമം. പാര്ട്ടിക്കുള്ളില് നിന്ന് തന്നെ രാഹുലിനെതിരേ ശക്തമായ പ്രതിഷേധം ഉയര്ന്നിരുന്നു.
