മലയാള ചലച്ചിത്ര താരങ്ങളുടെ സംഘടനയായ 'അമ്മ'യുടെ ഭാരവാഹി തെരഞ്ഞെടുപ്പില് മത്സരിക്കാത്തതിന്റെ കാരണങ്ങള് വ്യക്തമാക്കി നടി ഉര്വശി. അംഗങ്ങള്ക്കെതിരെയെടുക്കുന്ന തീരുമാനങ്ങളില് സംഘടന ഫലപ്രദമായി ശബ്ദമുയര്ത്തുകയും പ്രതിഷേധിക്കുകയും ചെയ്യുമെന്ന് താന് വിശ്വസിച്ചിരുന്നില്ലെന്ന് ഉര്വശി പറഞ്ഞു. സംഘടനയില് വിശ്വാസമുണ്ടെങ്കില് മത്സരിക്കാതിരിക്കാനുള്ള തന്റെ തീരുമാനം മാറുമെന്നും താരം അറിയിച്ചു.
അമ്മയുടെ തലപ്പത്ത് ഇരുന്ന് താന് വിളിച്ചിരുന്നെങ്കില് ഡബ്ല്യുസിസി അംഗങ്ങള് സംഘടനയിലേക്ക് വരുമെന്നും ആ കുടുംബത്തിലുണ്ടാകുമായിരുന്നുവെന്നും ഉര്വശി വ്യക്തമാക്കി. ഒരു ന്യൂസ് ചാനലിന് നല്കിയ പ്രത്യേക അഭിമുഖത്തില് സംസാരിക്കുകയായിരുന്നു താരം .
'ഏത് സംഘടനയായാലും ചില പ്രതിഷേധങ്ങള് ഒരാളുടെ മാത്രം ശബ്ദമായി വളരെക്കാലം നിലനില്ക്കും. പ്രതിഷേധങ്ങള് സംഘടിപ്പിക്കുമ്പോള്, അവയുടെ മൂല്യം വലുതാണ്. അതിനുള്ള സമയമാണിതെന്ന് ഞാന് കരുതുന്നില്ല. അതുകൊണ്ടാണ് മത്സരിക്കാതിരുന്നത്.
നമുക്കെതിരെയുള്ള ഏതൊരു നിലപാടിനെതിരെയും ശബ്ദമുയര്ത്താനും പ്രതിഷേധിക്കാനും ആത്മവിശ്വാസമില്ലാത്തതിനാലാണ് മത്സരിക്കാത്തത്. ആ ആത്മവിശ്വാസം വരുമ്പോള് ഞാന് മത്സരിക്കും. ഞാന് അതിന്റെ തലപ്പത്ത് ഇരുന്ന് വിളിച്ചാല് ഡബ്ല്യസിസി അംഗങ്ങള് അമ്മയിലേക്ക് വരും. അവര് ആ കുടുംബത്തിലുണ്ടാകും.' - ഉര്വശി കൂട്ടിച്ചേര്ത്തു.
