സി പി രാധാകൃഷ്ണന് ഇന്ത്യയുടെ പുതിയ ഉപരാഷ്ട്രപതി; 'ഇന്ത്യ' മുന്നണിയുടെ വോട്ട് ചോര്ന്നു
ന്യൂഡല്ഹി: ഇന്ത്യയുടെ പുതിയ ഉപരാഷ്ട്രപതിയായി തെരഞ്ഞെടുക്കപ്പെട്ട് എന്ഡിഎ സ്ഥാനാര്ത്ഥി സി പി രാധാകൃഷ്ണന്. നിലവില് മഹാരാഷ്ട്ര ഗവര്ണറാണ് സി പി രാധാകൃഷ്ണന്. ആകെ പോള് ചെയ്ത 767 വോട്ടുകളില് 452 വോട്ടുകള് നേടിയാണ് സി പി രാധാകൃഷ്ണന്റെ വിജയം. 152 വോട്ടിന്റെ ഭൂരിപക്ഷത്തിനാണ് സി പി രാധാകൃഷ്ണന് തെരഞ്ഞെടുക്കപ്പെട്ടിരിക്കുന്നത്.
'ഇന്ത്യ' മുന്നണി സ്ഥാനാര്ത്ഥി ബി സുദര്ശന് റെഡ്ഡിക്ക് 300 വോട്ടുകള് നേടി. 15 വോട്ടുകള് അസാധുവായി. പ്രതിപക്ഷ മുന്നണിയ്ക്ക് ലഭിക്കേണ്ടിയിരുന്ന 14 വോട്ടുകള് സി പി രാധാകൃഷ്ണന് അധികമായി ലഭിച്ചിട്ടുണ്ട്. ആര്എസ്എസിന്റെ വളരെ പ്രധാനപ്പെട്ട നേതാക്കളില് ഒരാളാണ് സി പി രാധാകൃഷ്ണന്. ആര്എസ്എസിലൂടെ വന്ന നേതാവിനെ തന്നെ ഉപരാഷ്ട്രപതി പദവിയിലേയ്ക്ക് നിയോഗിക്കുക എന്ന രാഷ്ട്രീയ തീരുമാനം കൂടിയാണ് ഇതിലൂടെ ബിജെപി നടപ്പിലാക്കിയിരിക്കുന്നതെന്നാണ് വിലയിരുത്തപ്പെടുന്നത്. ബിആര്എസ്, ബിജെഡി, അകാലി ദള് എന്നീ പാര്ട്ടികള് വോട്ടെടുപ്പില് നിന്ന് വിട്ടുനിന്നു.
വിജയിക്കാന് കഴിഞ്ഞില്ലെങ്കിലും 324 വോട്ട് നേടാന് കഴിയുമെന്നായിരുന്നു ഇന്ഡ്യ മുന്നണി പ്രതീക്ഷിച്ചിരുന്നത്. ഇന്നലെ വൈകീട്ടും 315 വോട്ടുകള് ലഭിക്കുമെന്ന് ഇന്ഡ്യ മുന്നണി നേതാക്കള് പറഞ്ഞിരുന്നു. എന്നാല് വോട്ടെണ്ണി കഴിഞ്ഞപ്പോള് 300 വോട്ടുകളാണ് ലഭിച്ചത്.
നേരത്തെ തന്നെ 'ഇന്ത്യ' സഖ്യം വിട്ട എഎപിയിലെ ചില എംപിമാര് ബിജെപിയോട് മൃദുസമീപനം എടുത്തു. ശിവസേന ഉദ്ദവ് താക്കറേ വിഭാഗം എംപിമാരില് ഒരു വിഭാഗം ഏക്നാഥ് ഷിന്ഡെ വിഭാഗവുമായി കൈകോര്ക്കാന് ആഗ്രഹിക്കുന്നു. ഇതിനാല് അവരും എന്ഡിഎ സ്ഥാനാര്ത്ഥിക്ക് വോട്ട് ചെയ്തെന്നാണ് 'ഇന്ത്യ' മുന്നണിയുടെ വിലയിരുത്തല്.
