തനിക്കെതിരായ ലൈംഗികാരോപണങ്ങള്ക്ക് പിന്നില് ഗൂഢാലോചനയുണ്ടെന്ന് റാപ്പര് വേടന്. അതില് യാതൊരു സംശയവും തനിക്കില്ലെന്നും വേടന് പറഞ്ഞു. വേടനെ സ്ഥിരം കുറ്റവാളിയാക്കാന് ശ്രമം നടക്കുന്നുവെന്ന് കാണിച്ച് സഹോദരന് മുഖ്യമന്ത്രിക്ക് നല്കിയ പരാതിയെ കുറിച്ചുള്ള മാധ്യമപ്രവര്ത്തകരുടെ ചോദ്യത്തിനായിരുന്നു പ്രതികരണം.
കേസ് നിലനില്ക്കുന്ന സാഹചര്യത്തില് കൂടുതലൊന്നും പറയുന്നില്ല. ഈ തിരക്കും കേസുമെല്ലാം കഴിഞ്ഞ് ബാക്കികാര്യങ്ങളെല്ലാം സംസാരിക്കാമെന്നും വേടന് പറഞ്ഞു. ഗൂഢാലോചനയുണ്ടായി എന്നതില് തനിക്ക് യാതൊരുവിധ സംശയവുമില്ല. അക്കാര്യങ്ങളെല്ലാം പിന്നീട് പറയാമെന്നും വേടന് വ്യക്തമാക്കി. ഗവേഷക വിദ്യാര്ഥി നല്കിയ ലൈംഗികാതിക്രമ പരാതിയില് എറണാകുളം സെന്ട്രല് സ്റ്റേഷനില് ഹാജരാകാനെത്തിയതായിരുന്നു വേടന്.
വേടനെതിരായ കേസുകളും കാര്യങ്ങളും കൊണ്ട് കുടുംബത്തിന് ഉണ്ടാകുന്ന ബുദ്ധിമുട്ടുകളാണ് പരാതിയില് പറഞ്ഞിരിക്കുന്നതെന്ന് വേടന്റെ സഹോദരന് ഹരിദാസ് വ്യക്തമാക്കിയിരുന്നു. ആദ്യമായാണ് ഇത്തരം കാര്യങ്ങളിലൂടെ കടന്നുപോകുന്നത്. പരാതി കൊടുത്തതിനു ശേഷം പൊലീസ് ബന്ധപ്പെട്ടിട്ടില്ലെന്നും കുടുംബത്തെ തന്നെ ഇല്ലാതാക്കുന്ന രീതിയിലാണ് പരാതികള് വരുന്നതെന്നും സഹോദരന് മാധ്യമങ്ങളോട് പറഞ്ഞിരുന്നു.
വിവാഹ വാഗ്ദാനം നല്കി അഞ്ചുതവണ പീഡിപ്പിച്ചുവെന്ന യുവ ഡോക്ടറുടെ പരാതിയില് വേടനെ തൃക്കാക്കര പൊലീസ് ബുധനാഴ്ച അറസ്റ്റ് ചെയ്തിരുന്നു. തുടര്ന്ന് മുന്കൂര് ജാമ്യമുള്ളതിനാല് വൈദ്യ പരിശോധനയ്ക്ക് ശേഷം വിട്ടയച്ചു. വേടനെതിരെ ഡിജിറ്റല് തെളിവുകള് അടക്കം ഉണ്ടെന്ന് അന്വേഷണസംഘം വ്യക്തമാക്കിയിരുന്നു.
അതേസമയം ലൈംഗിക ആരോപണങ്ങള്ക്കിടെ കഴിഞ്ഞ ദിവസം വേടന് സംഗീത പരിപാടിയില് പങ്കെടുത്തിരുന്നു. പത്തനംതിട്ട കോന്നിയില് നടന്ന സംഗീത പരിപാടിയിലാണ് വേടന് പങ്കെടുത്തത്. താന് എവിടെയും പോയിട്ടില്ലെന്നായിരുന്നു പരിപാടിക്കിടെ വേടന് നടത്തിയ പ്രതികരണം.
