അഫ്ഗാനിസ്ഥാനില്‍ താലിബാന്‍ തടങ്കലില്‍ കഴിഞ്ഞ എട്ടുമാസത്തിലേറെയായി അകപ്പെട്ടിരുന്ന ബ്രിട്ടീഷ് ദമ്പതികളായ പീറ്റര്‍ റെയ്നള്‍ഡ്സും (80) ഭാര്യ ബാര്‍ബിയും (76) മോചിതരായി. ഖത്തറിന്റെ ഇടപെടലിലൂടെയാണ് ഇവരെ വിട്ടയച്ചത് . ആദ്യം ഖത്തറിലേയ്ക്ക് കൊണ്ടുപോയി മെഡിക്കല്‍ പരിശോധനകള്‍ക്ക് വിധേയരാക്കിയതിന് ശേഷം അവര്‍ യുകെലേയ്ക്ക് മടങ്ങും. 2021-ല്‍ താലിബാന്‍ അധികാരം പിടിച്ചടക്കിയപ്പോള്‍ പല പാശ്ചാത്യരും രാജ്യം വിട്ടെങ്കിലും രണ്ടര പതിറ്റാണ്ടായി ബാമിയാന്‍ പ്രവിശ്യയില്‍ ജീവിച്ചിരുന്ന ഇവര്‍ ആഫ്ഗാനിസ്ഥാന്‍ വിട്ടുപോകാന്‍ തയാറായില്ലായിരുന്നു.
പീറ്ററും ബാര്‍ബിയും 1970-ല്‍ കാബൂളില്‍ വെച്ചാണ് വിവാഹിതരായത് . കഴിഞ്ഞ 18 വര്‍ഷമായി അവര്‍ ആഫ്ഗാനിസ്ഥാനില്‍ പ്രാദേശികര്‍ക്കായി തൊഴില്‍ പരിശീലന പരിപാടി നടത്തുകയായിരുന്നു. താലിബാന്‍ അധികാരം പിടിച്ച ശേഷവും പ്രാദേശിക അധികാരികളുടെ അംഗീകാരത്തോടെ സേവനം തുടരുകയായിരുന്നു. 2025 ഫെബ്രുവരി 1-ന് അവര്‍ യാത്ര ചെയ്യുന്നതിനിടെ താലിബാന്‍ ഭരണകൂടം ഇവരെ തടവിലാക്കുകയായിരുന്നു . നിയമലംഘനമാണെന്നാരോപിച്ച് പിടികൂടിയെങ്കിലും വ്യക്തമായ കുറ്റപത്രം ഇതുവരെ നല്‍കിയിരുന്നില്ല . തടവിലിരിക്കെ ഇവര്‍ ഗുരുതര ആരോഗ്യപ്രശ്നങ്ങള്‍ നേരിട്ടതായി മക്കളും യു.എന്നും വ്യക്തമാക്കിയിരുന്നു. മകന്‍ ജോനാഥന്‍ റെയ്നള്‍ഡ്സ് പറഞ്ഞത് പ്രകാരം, പിതാവ് പലപ്പോഴും കുഴഞ്ഞു വീഴുകയും മാതാവ് ക്ഷയരോഗം, പോഷകാഹാര കുറവ് എന്നിവ മൂലവും അവശയായിരുന്നു.
കുടുംബാംഗങ്ങളും അന്താരാഷ്ട്ര സംഘടനകളും മാസങ്ങളായി നടത്തിയ ശക്തമായ ഇടപെടലോടെയാണ് മോചനം നടന്നത്. ഖത്തര്‍ സ്ഥാനപതി ഇവര്‍ക്ക് മരുന്നും ഡോക്ടര്‍ സഹായവും കുടുംബവുമായി ബന്ധപ്പെടാനുള്ള സൗകര്യവും തടവിനിടെ ഒരുക്കിയിരുന്നു. ബ്രിട്ടീഷ് സര്‍ക്കാര്‍ താലിബാനെ അംഗീകരിക്കുന്നില്ലെന്നും കാബൂളിലെ എംബസി അടച്ചിരിക്കുന്നതിനാല്‍ സഹായം പരിമിതമാണെന്നും വിദേശകാര്യ ഓഫീസ് നേരത്തെ വ്യക്തമാക്കിയിരുന്നു. ഒടുവില്‍, ബ്രിട്ടീഷ് പ്രത്യേക പ്രതിനിധി റിച്ചാര്‍ഡ് ലിന്‍ഡ്സിയ്ക്ക് കൈമാറിയാണ് ദമ്പതികളെ ഖത്തറിലേയ്ക്കുള്ള വിമാനത്തില്‍ അയച്ചത്.
