കൊച്ചി: ഭൂട്ടാന് വാഹനക്കടത്തില് കുരുക്ക് മുറുക്കാന് എന്ഫോഴ്സ്മെന്റ് ഡയറക്ട്രേറ്റും. നടന് മമ്മൂട്ടി, ദുല്ഖര് സല്മാന്, പൃഥ്വിരാജ് എന്നിവരുടെ വീട്ടിലടക്കം 17 ഇടങ്ങളില് പരിശോധന നടത്തുകയാണ്. ദുല്ഖറിന്റെ മൂന്ന് വീട്ടിലും മമ്മൂട്ടിയുടെ വീട്ടിലും ഉദ്യോഗസ്ഥര് എത്തി. പ്രാഥമിക അന്വേഷണത്തിന്റെ ഭാഗമായാണ് പരിശോധനയെന്നാണ് വിവരം. ഇ ഡി കൊച്ചി യൂണിറ്റിലെ ഉദ്യോഗസ്ഥരാണ് നടന്മാരുടെ വീട്ടിലെത്തിയത്.
ദുല്ഖറിന്റെ കൊച്ചിയിലെ രണ്ട് വീട്ടിലും ചെന്നൈയിലെ ഒരു വീട്ടിലുമാണ് പരിശോധന. 'മമ്മൂട്ടി ഹൗസ്' എന്ന് അറിയപ്പെടുന്ന മമ്മൂട്ടിയുടെ പഴയ വീട്ടിലും മമ്മൂട്ടി ഇപ്പോള് താമസിക്കുന്ന കടവന്ത്രയിലെ വീട്ടിലും റെയ്ഡ് നടക്കുകയാണ്. നിലവില് കടവന്ത്രയിലെ വീട്ടിലാണ് ദുല്ഖറും താമസിക്കുന്നത്.
നടന് അമിത് ചക്കാലക്കലിന്റെ വീട്ടിലും അഞ്ച് ജില്ലകളിലെ വാഹന ഡീലര്മാരുടെ വീടുകളിലും പരിശോധന വ്യാപിപ്പിച്ചിട്ടുണ്ട്. കോട്ടയം, തൃശൂര്, മലപ്പുറം, കോഴിക്കോട് ജില്ലകളിലും ചെന്നൈയിലും റെയ്ഡ് എന്നാണ് വിവരം. ഫെമ നിയമലംഘനത്തിന്റെ ഭാഗമായാണ് റെയ്ഡ് എന്നാണ് ഇ ഡിയുടെ വിശദീകരണം.
ലാന്ഡ് ക്രൂയിസര്, ഡിഫെന്ഡര്, മസെരാട്ടി തുടങ്ങിയ ആഡംബര കാറുകള് ഇന്ത്യ-ഭൂട്ടാന്, നേപ്പാള് വഴികളിലൂടെ അനധികൃതമായി ഇറക്കുമതി ചെയ്യുകയും രജിസ്റ്റര് ചെയ്യുകയും ചെയ്യുന്ന ഒരു സിന്ഡിക്കേറ്റിനെക്കുറിച്ചുള്ള വിവരങ്ങളുടെ അടിസ്ഥാനത്തിലാണ് പരിശോധനയെന്ന് ഇ ഡി അധികൃതര് പറഞ്ഞു.
കോയമ്പത്തൂര് കേന്ദ്രീകരിച്ചുള്ള ഒരു സംഘം ഇന്ത്യന് ആര്മി, യുഎസ് എംബസി, വിദേശകാര്യ മന്ത്രാലയം എന്നിവയില് നിന്നുള്ള വ്യാജ രേഖകളും അരുണാചല് പ്രദേശ്, ഹിമാചല് പ്രദേശ് തുടങ്ങിയ സംസ്ഥാനങ്ങളിലെ തട്ടിപ്പിലൂടെയുള്ള ആര്ടിഒ രജിസ്ട്രേഷനുകളും ഉപയോഗിച്ചാണ് വാഹനങ്ങള് കടത്തിയത്. ഈ വാഹനങ്ങള് പിന്നീട് സിനിമ താരങ്ങള് ഉള്പ്പെടെയുള്ള സമ്പന്നരായ വ്യക്തികള്ക്ക് കുറഞ്ഞ വിലയ്ക്ക് വില്ക്കുകയായിരുന്നു.
ഭൂട്ടാന് വാഹനക്കടത്തുമായി ബന്ധപ്പെട്ട് കസ്റ്റംസും നേരത്തെ റെയ്ഡ് സംഘടിപ്പിച്ചിരുന്നു.
