സിനിമാ പ്രമോഷന്റെ ഭാഗമായി കോഴിക്കോട് മാളിലെത്തിയ നടി നവ്യ നായരോട് മോശമായി പെരുമാറാന്‍ ശ്രമം. 'പാതിരാത്രി' എന്ന ചിത്രത്തിന്റെ പ്രമോഷനിടെയാണ് സംഭവം. നവ്യയോട് മോശമായി പെരുമാറുന്നത് നടന്‍ സൗബിന്‍ ഷാഹിര്‍ തടയുന്നുമുണ്ട്. ശനിയാഴ്ച വെെകുന്നേരമാണ് പ്രമോഷന്‍ പരിപാടി നടന്നത്.
താരങ്ങളെ കാണാന്‍ വലിയ തിരക്കായിരുന്നു മാളില്‍ അനുഭവപ്പെട്ടത്. ഈ തിരക്കിനിടെ ഒരാള്‍ നവ്യയെ സ്‌പര്‍ശിക്കാന്‍ ശ്രമിക്കുകയായിരുന്നു. എന്നാല്‍ നവ്യയ്ക്ക് നേരെ നീണ്ട കെെ സൗബിന്‍ സാഹിര്‍ ഉടന്‍ തന്നെ തടയുകയായിരുന്നു. ഇതിന്റെ വീഡിയോ പുറത്തുവന്നിട്ടുണ്ട്. അപ്രതീക്ഷിതമായി തനിക്കെതിരെ ഉണ്ടായ പെരുമാറ്റത്തില്‍ രൂക്ഷമായ ഒരു നോട്ടത്തോടെയാണ് നവ്യ പ്രതികരിച്ചത്.
നവ്യ, സൗബിന്‍ എന്നിവരെ കേന്ദ്ര കഥാപാത്രങ്ങളാക്കി റത്തീന സംവിധാനം ചെയ്ത ‘പാതിരാത്രി’ ഒക്ടോബര്‍ 17നാണ് തിയേറ്ററില്‍ എത്തുന്നത്. മമ്മൂട്ടി ചിത്രം പുഴുവിനുശേഷം റത്തിന സംവിധാനം ചെയ്യുന്ന ചിത്രം ആണ്. നവ്യ നായരും സൗബിന്‍ ഷാഹിറും പൊലീസുകാരായെത്തുന്നു. ഒരു കൊലപാതകവുമായി ബന്ധപ്പെട്ട അന്വേഷണമാണ് പാതിരാത്രി. സണ്ണി വെയ്ന്‍, ആന്‍ അഗസ്റ്റിന്‍ എന്നിവരും പ്രധാന കഥാപാത്രങ്ങളെ അവതരിപ്പിക്കുന്നു. ആത്മീയ രാജന്‍, ശബരീഷ് വര്‍മ്മ, ഹരിശ്രീ അശോകന്‍, അച്യുത് കുമാര്‍, ഇന്ദ്രന്‍സ്, തേജസ് എന്നിവരാണ് മറ്റു താരങ്ങള്‍. തിരക്കഥ ഷാജി മാറാട്.
