യുകെയില്‍ പാര്‍ക്കില്‍ യുവതിയ്ക്ക് നേരെ ലൈംഗിക അതിക്രമം: മലയാളി യുവാവ് റിമാന്‍ഡില്‍
യുകെയില്‍ സ്ത്രീക്കെതിരെ ലൈംഗിക അതിക്രമം നടത്തിയ കേസില്‍ മലയാളി യുവാവ് റിമാന്‍ഡില്‍ . തിരുവനന്തപുരം സ്വദേശിയായ മനോജ്‌ ചിന്താതിര(29) എന്ന യുവാവിനെയാണ് പൊലീസ് അറസ്റ്റ് ചെയ്തത് . യുകെയിലെ സോമര്‍സെറ്റ് ടോണ്ടനിലാണ് യുവാവിനെ പൊലീസ് അറസ്റ്റ് ചെയ്തത്.
ടോണ്ടനിലെ വിക്ടോറിയ പാര്‍ക്കില്‍ ഒക്ടോബര്‍ 11നായിരുന്നു കേസിനു ആസ്പദമായ സംഭവം നടന്നത് എന്നാണ് പൊലീസ് പറയുന്നത്. പ്രതിയെ നോര്‍ത്ത് സോമര്‍സെറ്റ് കോടതിയില്‍ ഹാജരാക്കി. സ്ത്രീയുടെ മൊഴിയുടെ അടിസ്ഥാനത്തില്‍ പീഡനക്കുറ്റം ഉള്‍പ്പെടെ രണ്ട് കേസുകളാണ് ചുമത്തിയത്. കോടതി പ്രതിയെ റിമാന്‍ഡ് ചെയ്തു. തുടര്‍ വിചാരണ നവംബര്‍ 14 ന് നടക്കും.
ഒക്ടോബര്‍ 11ന് പുലര്‍ച്ചെ ഒരു സ്ത്രീയെ പാര്‍ക്കിനുള്ളില്‍ വിഷമാവസ്ഥയിലായ നിലയില്‍ കണ്ടെത്തിയതിനെ തുടര്‍ന്ന് പ്രദേശവാസികള്‍ പൊലീസിനെ അറിയിക്കുക ആയിരുന്നു. തുടര്‍ന്ന് പൊലീസ് ഒക്ടോബര്‍ 12ന് വൈകിട്ട് 6.30നാണ് പാര്‍ക്കിന് സമീപത്തായി താമസിച്ചിരുന്ന മനോജിനെ അറസ്റ്റ് ചെയ്തത്.
സിസിടിവി ദൃശ്യങ്ങളുടെ അടിസ്ഥാനത്തില്‍ നടത്തിയ അന്വേഷണത്തില്‍ ആയിരുന്നു അറസ്റ്റ്. വിവിധ കെയര്‍ ഹോമുകളില്‍ കെയര്‍ അസിസ്റ്റന്റ് ആയും മറ്റും താത്കാലിക കരാറില്‍ ജോലി ചെയ്തിരുന്ന യുവാവ് ലണ്ടനില്‍ വിദ്യാര്‍ഥി വീസയില്‍ എത്തിയ ശേഷം പിന്നീട് ടോണ്ടനില്‍ ജോലി തേടി എത്തുകയായിരുന്നു എന്നാണ് പ്രാഥമിക വിവരം.
