ടി പി കേസ് പ്രതികള്ക്കായി വീണ്ടും അസാധാരണ നീക്കം; പ്രതികളെ വിടുതല് ചെയ്യുന്നതില് സുരക്ഷാപ്രശ്നമുണ്ടോയെന്ന് ചോദിച്ച് കത്ത്
ടിപി ചന്ദ്രശേഖരന് വധക്കേസിലെ പ്രതികള്ക്കായി അസാധാരണ നീക്കവുമായി ജയില് വകുപ്പ്. ടിപി വധക്കേസിലെ പ്രതികളെ വിടുതല് ചെയ്യുന്നതില് ഏതെങ്കിലും തരത്തിലുള്ള സുരക്ഷാപ്രശ്നമുണ്ടോയെന്ന് ചോദിച്ച് ജയില് ആസ്ഥാനത്ത് നിന്ന് കത്ത് അയച്ചു.
എല്ലാ ജയില് സൂപ്രണ്ടുമാര്ക്കുമാണ് ജയില് ആസ്ഥാനത്ത് നിന്ന് കത്തയച്ചിരിക്കുന്നത്. പ്രതികളെ ജയിലില് നിന്ന് എന്നന്നേക്കുമായി വിട്ടയക്കുന്നതിനാണോ അതോ പരോള് ആണോ എന്ന് കത്തില് പറയുന്നില്ല. അതേസമയം, ഇക്കാര്യത്തില് വിശദീകരണവുമായി ജയില് എഡിജിപി രംഗത്തെത്തി. പ്രതികളെ വിട്ടയക്കാനുള്ള കത്തല്ലെന്നാണ് എഡിജിപി ബല്റാംകുമാര് ഉപധ്യായ വ്യക്തമാക്കുന്നത്. മാഹി ഇരട്ടക്കൊല കേസിലും ടിപി വധക്കസിലെ പ്രതികള് ഉള്പ്പെട്ടിരുന്നു. മാഹി വധക്കേസിലെ പ്രതികളെ വിട്ടയച്ചിരുന്നു. മാഹി വധക്കേസിലെ പ്രതികള്ക്ക് പരോള് നല്കിയാല് സുരക്ഷാ പ്രശ്നമുണ്ടോയെന്നാണ് കത്തില് ഉദ്ദേശിച്ചതെന്നുമാണ് ജയില് മേധാവി എഡിജിപി ബല്റാംകുമാര് ഉപധ്യായ വിശദീകരിക്കുന്നത്. ടിപി വധക്കേസിലെ പ്രതികളെ 20വര്ഷത്തേക്ക് വിട്ടയക്കരുതെന്ന കോടതി ഉത്തരവ് നിലനില്ക്കെയാണ് ഇത്തരമൊരു അസാധാരണ നടപടി.
ടിപി ചന്ദ്രശേഖരന് വധക്കേസ് പ്രതികള്ക്കായുള്ള സര്ക്കാരിന്റെ അസാധാരണ നീക്കത്തിനെതിരെ കെകെ രമ രംഗത്ത്. ഇത് അസാധാരണ നടപടിയാണെന്ന് കെ കെ രമ പ്രതികരിച്ചു. ടി പി ചന്ദ്രശേഖരന് വധക്കേസ് പ്രതികളെ പുറത്തുവിട്ടാല് ആഭ്യന്തര സുരക്ഷാ പ്രശ്നം ഉണ്ടാകുമോ എന്ന് ചോദിച്ചാണ് സെന്ട്രല് ജയില് സൂപ്രണ്ടുമാര്ക്കും വിയ്യൂര് അതീവ സുരക്ഷ ജയില് സൂപ്രണ്ടിനും ജയില് ആസ്ഥാനത്ത് നിന്ന് കത്തയച്ചത്.
പ്രതികളെ പുറത്തുവിട്ടാല് സുരക്ഷാപ്രശ്നമുണ്ടാകുമോ എന്ന് അറിയേണ്ടത് ജയില് സൂപ്രണ്ടുമാര്ക്കല്ലല്ലോ എന്ന് കെ കെ രമ ചോദിക്കുന്നു. ഇവിടുത്തെ പൊലീസ് മേധാവികള്ക്കാണല്ലോ. അവരാണല്ലോ തീരുമാനിക്കേണ്ടത്. അങ്ങനെയിരിക്കേ ഇങ്ങനെയൊരു കത്തെന്ന് പറയുന്നത് അസാധാരണവും വളരെയധികം നിഗൂഢതയുള്ളതുമാണെന്നാണ് എനിക്ക് തോന്നുന്നത്. എനിക്കിതില് വലിയ അത്ഭുതവും തോന്നുന്നില്ല. കാരണം പലപ്രാവശ്യം ഇത്തരം നടപടികള് നമ്മള് കണ്ടുകഴിഞ്ഞു എന്നും കെ കെ രാമപറയുന്നു.
ടികെ രജീഷ് എന്ന് പറയുന്ന ഈ കേസിലെ പ്രതിക്ക് നാല്പ്പത്തി അഞ്ച് ദിവസമാണ് സുഖ ചികിത്സയ്ക്ക് വേണ്ടി, ചികിത്സ അവധിക്ക് കൊടുത്തിരിക്കുന്നത്. ചികിത്സയിലാണിപ്പോഴുള്ളത്. പലരെയും മറികടന്നുകൊണ്ട് ടിപി കേസിലെ പ്രതികള്ക്കാണ് ഇപ്പോള് അതിനുള്ള അവസരം ഉണ്ടായിരിക്കുന്നത്. വളരെ കൃത്യമായിട്ട് പരോള് കിട്ടും, സുഖ ചികിത്സ കിട്ടും, കള്ള് കിട്ടും, ഭക്ഷണം കിട്ടും. ഒരു പ്രശ്നവുമില്ല. ഇഷ്ടം പോലെ ലാവിഷായിട്ട് ജീവിക്കാനുള്ള സൗകര്യമാണ് ഈ സര്ക്കാര് ഈ ടിപി കേസ് പ്രതികള്ക്ക് ചെയ്തു കൊടുക്കുന്നുത്.
ഇനി ആറ് മാസം കൂടിയേ ഉള്ളൂ. അതിനിടയ്ക്ക് വിട്ടയക്കാനുള്ള പല നീക്ക നടത്തി. ഉള്ളില് കൂടെയുള്ള ശ്രമങ്ങള് നടത്തി. അതൊന്നും വിജയിച്ചില്ല. ഞങ്ങള് ഇതൊക്കെ ഇപ്പോഴും ചെയ്തു കൊണ്ടേ ഇരിക്കുന്നുണ്ട്. തുടര്ന്നുകൊണ്ടേ ഇരിക്കുന്നുണ്ട്. എന്ന പ്രതികളെ ഒന്ന് ബോധ്യപ്പെടുത്തുക. അവരെ ഒന്ന് സമാധാനിപ്പിക്കുക. ഇതാണ് ചെയ്യുന്നത് എന്നും കെ കെ രമ പറഞ്ഞു.
