ഇന്ത്യന് ചരിത്രത്തില് ആദ്യമായി വനിതാ ലോകകപ്പ് ക്രിക്കറ്റ് കിരീടം സ്വന്തമാക്കി ഇന്ത്യന് വനിതകള്. ഫൈനലില് ദക്ഷിണാഫ്രിക്കയെ 52 റണ്സിനാണ് ഇന്ത്യ കീഴടക്കിയത്. ഇന്ത്യന് വനിതകളുടെ ആദ്യ ഏകദിന ലോകകപ്പ് കിരീടവും ഒപ്പം തന്നെ ആദ്യ ഐ സി സി കിരീടവും കൂടിയാണ് ഇത്. മത്സരത്തില് ഇന്ത്യ 50 ഓവറില് ആറ് വിക്കറ്റ് നഷ്ടത്തില് 298 റണ്സ് നേടി. ദക്ഷിണാഫ്രിക്കയുടെ മറുപടി ബാറ്റിങ് 246 റണ്സില് അവസാനിച്ചു.
ക്യാപ്റ്റന് ലോറ വോള്വാര്ഡ് ദക്ഷിണാഫ്രിക്കയ്ക്ക് വേണ്ടി സെഞ്ച്വറിയുമായി തിളങ്ങിയെങ്കിലും ഫലമുണ്ടായില്ല. 98 പന്തില് 11 ഫോറുകളും ഒരു സിക്സറും അടക്കമായിരുന്നു ലോറയുടെ 101 റണ്സിന്റെ ഇന്നിങ്സ്.ഇന്ത്യക്ക് വേണ്ടി ദീപ്തി ശര്മ അഞ്ചു വിക്കറ്റും ഷെഫാലി വര്മ രണ്ട് വിക്കറ്റും നേടി.
നേരത്തെ ടോസ് നഷ്ടപ്പെട്ട് ബാറ്റിങിനിറങ്ങുകയായിരുന്നു ഇന്ത്യ. ഷെഫാലി വര്മ(87), ദീപ്തി ശര്മ (58), സ്മൃതി മന്ദാന (45) എന്നിവര് തിളങ്ങി. റിച്ച ഘോഷ് (34), ജെമീമ റോഡ്രിഗസ്(24), ഹര്മന്പ്രീത് കൗര്(20 ) എന്നിവര് ഭേദപ്പെട്ട പ്രകടനം നടത്തി.
ഗ്രൂപ്പ് സ്റ്റേജില് വെച്ച് ഓസ്ട്രേലിയയോടും സൗത്ത് ആഫ്രിക്കയോടും പരാജയം ഏറ്റുവാങ്ങിയ ഇന്ത്യപിന്നീട് അതേ ടീമിനെ സെമിയിലും ഫൈനലിലും തോല്പിച്ച് തങ്ങളുടെ ആദ്യ ലോകകപ്പ് കിരീടം നേടുകയായിരുന്നു.
ഷഫാലി വര്മയുടെ ഓള് റൗണ്ട് മികവാണ് ഇന്ത്യയ്ക്ക് ലോകകിരീടം സമ്മാനിച്ചിരിക്കുന്നത്. കഴിഞ്ഞ രണ്ട് തവണയും കപ്പിനും ചുണ്ടിനുമിടയില് നഷ്ടപ്പെട്ട കിരീടമാണ് സ്വന്തം മണ്ണില് ഇന്ത്യ നേടിയെടുത്തിരിക്കുന്നത്.
