വിസ നിയമങ്ങളിലെ മാറ്റങ്ങള് പ്രാബല്യത്തില്; വിദേശ വിദ്യാര്ത്ഥി അപേക്ഷകര്ക്ക് അക്കൗണ്ടില് കൂടുതല് തുക കാണിക്കേണ്ടിവരും
ബ്രിട്ടീഷ് വിസ നിയമങ്ങളിലെ മാറ്റങ്ങള് പ്രാബല്യത്തില് വന്നു. വിദേശ രാജ്യങ്ങളില് നിന്ന് യുകെ സ്റ്റുഡന്റായി അപേക്ഷിക്കുന്നവര്ക്ക് ഇനി അക്കൗണ്ടില് കൂടുതല് തുക കാണിക്കേണ്ടിവരും. ലണ്ടനില് 9 മാസക്കാലത്തേക്ക് ചുരുങ്ങിയത് 1529 പൗണ്ട് എങ്കിലും വേണം. പുറത്താണെങ്കില് പ്രതിമാസം 1171 പൗണ്ടു വേണം. ഈ തുക തുടര്ച്ചയായി 28 ദിവസങ്ങള് ബാങ്കില് ഉണ്ടായിരിക്കുകയും വേണം.
കുറ്റകൃത്യത്തില് ശിക്ഷിക്കപ്പെടുന്ന കുടിയേറ്റക്കാരായ കുറ്റവാളികള്ക്ക് വിസ നിരാകരിക്കുന്ന വ്യവസ്ഥ നവംബര് 11 മുതല് നിലവില് വന്നു. ഗുരുതര കുറ്റകൃത്യത്തില്പ്പെടാല് ഉടന് നാടുകടത്തും. നേരത്തെ നാലു വര്ഷത്തില് കുറവ് ശിക്ഷ ലഭിച്ചവര്ക്ക് വിസയുടെ കാര്യത്തില് ഇളവ് നല്കിയിരുന്നു. ഇതു മാറ്റം വരുത്തുകയാണ്. സീസണല് വര്ക്കര് വിസയിലും മാറ്റം വന്നു. പത്തുമാസ കാലയളവിലും ആറു മാസക്കാലവും ബ്രിട്ടനില് ജോലി ചെയ്യാന് കഴിയും. സുരക്ഷ ആശങ്കയുണ്ടെങ്കില് ഫാമിലി വിസ നിഷേധിക്കാനും അനുമതിയുണ്ട്.
ബ്രിട്ടനില് ജോലി ചെയ്യാന് എത്തുന്നവര് എ ലെവല് സ്റ്റാന്ഡേര്ഡ് ഇംഗ്ലീഷ് ഭാഷ പരീക്ഷ പാസാകണമെന്ന നിബന്ധന ജനുവരി വരെ നടപ്പിലാക്കില്ല. കുടിയേറ്റക്കാരുടെ എണ്ണം കുറയ്ക്കുന്നതിനായി സര്ക്കാര് കൊണ്ടു വന്ന പുതിയ നിയമങ്ങളുടെ ഭാഗമായിട്ടാണിത്. കഴിഞ്ഞയാഴ്ചയായിരുന്നു ഇത് സംബന്ധിച്ച പ്രഖ്യാപനം ഉണ്ടായത്. അടുത്ത വര്ഷം ജനുവരി എട്ടു മുതല് ഇത് പ്രാബല്യത്തില് വരും. അതിന് ശേഷം സ്കില്ഡ് വര്ക്കര് വിസയ്ക്കോ, സ്കെയില് അപ് വിസയ്ക്കോ അപേക്ഷിക്കുന്നവര്ക്ക് ഇത് ബാധകമായിരിക്കും.
ഈ വിസകള്ക്കായി അപേക്ഷിക്കുന്നവര്ക്ക് ഇംഗ്ലീഷില് ബി2 ലെവല് നേടേണ്ടതായി വരും. നിലവില് ജിസിഎസ്ഇയിലെ ബി1 സ്റ്റാന്ഡേര്ഡിന് തത്തുല്യമായ ഭാഷാ പ്രാവീണ്യം മതിയാകും. ജനുവരി മുതല് വിസ അപേക്ഷ പരിഗണിക്കപ്പെടുന്നതിന് ഇംഗ്ലീഷില് എ ലെവല് പരീക്ഷ എഴുതി പാസാകേണ്ടതായി വരും.
സ്കില്ഡ് വര്ക്കര് വിസയില് ഉള്പ്പെടെ കുടിയേറ്റക്കാരെ ബാധിക്കുന്ന നിരവധി മാറ്റങ്ങളാണ് നടപ്പായിട്ടുള്ളത്. സ്കില്ഡ് വര്ക്കര് വിസയ്ക്കുള്ള ശമ്പളപരിധിയും, വിദ്യാഭ്യാസ യോഗ്യതയും ഉയര്ത്തുന്നതാണ് പ്രധാന മാറ്റം. ഈ വിസയില് ഏത് ജോലിയാണെങ്കിലും ബാച്ചിലര് ഡിഗ്രിയ്ക്ക് തുല്യമായ ആര്ക്യുഎഫ് ലെവല് 6 യോഗ്യത ആവശ്യമാണ്. ഇതോടെ ഈ വിസയുടെ യോഗ്യതാ ലിസ്റ്റിലുണ്ടായ 180-ഓളം ജോലികള് പുറത്തായി. ഹോസ്പിറ്റാലിറ്റി, ലോജിസ്റ്റിക്സ്, കെയര് സേവനങ്ങള് ഉള്പ്പെടെയാണ് ഇത്. എന്നിരുന്നാലും 2025 ജൂലൈ 21ന് മുന്പ് സര്ട്ടിഫിക്കറ്റ് ഓഫ് സ്പോണ്സര്ഷിപ്പ് പ്രസിദ്ധീകരിച്ചിട്ടുണ്ടെങ്കില് നിലവിലെ നിയമങ്ങള് പ്രകാരവും ആപ്ലിക്കേഷന് പ്രൊസസ് ചെയ്യും.
യോഗ്യതകള്ക്ക് പുറമെ ശമ്പളപരിധിയും വിവിധ വിസാ ഗ്രൂപ്പുകളില് വര്ദ്ധിപ്പിക്കുകയാണ്. സ്കില്ഡ് വര്ക്കര് വിസയ്ക്ക് 38,700 പൗണ്ട് മതിയായിരുന്ന ശമ്പളം ഇനി മുതല് 41,700 പൗണ്ടിലേക്കാണ് ഉയര്ത്തുന്നത്. സ്കില്ഡ് വര്ക്കര് അപേക്ഷകര് ഇന്ഡെഫനിറ്റ് ലീവ് ടു റിമെയിന് അപേക്ഷിക്കുമ്പോള് ജൂലൈ 22 മുതല് പുതിയ ശമ്പളപരിധിയില് വരുമെന്നത് തിരിച്ചടിയാണ്. പഴയ ശമ്പളപരിധി പ്രകാരം അപേക്ഷിച്ചവര്ക്കും ഇത് ബാധകമാണ്. ഇതില് ആശ്വാസം നല്കാന് കഴിയില്ലെന്ന് ഹോം ഓഫീസ് വ്യക്തമാക്കിയിട്ടുണ്ട്.
കൂടാതെ വിദേശ കെയര് വര്ക്കര്മാര്ക്ക് ഇനി ബ്രിട്ടനിലേക്ക് പ്രവേശിക്കാന് അവസരം ലഭിക്കില്ല. വന്തോതില് ചൂഷണത്തിനും, ദുരുപയോഗത്തിനും വിധേയമായതോടെയാണ് കെയര് വര്ക്കര് വിസ റൂട്ടില് വിദേശ റിക്രൂട്ട്മെന്റിന് അവസാനം കുറിച്ചത്. അതേസമയം ഹെല്ത്ത് & കെയര് വിസാക്കാരുടെ ശമ്പളപരിധി 25,000 പൗണ്ടില് നിലനിര്ത്തിയിട്ടുണ്ട്.
പെര്മനന്റ് റസിഡന്സിന് ബ്രിട്ടനില് താമസിച്ചിരിക്കേണ്ട കാലയളവ് വര്ദ്ധിപ്പിക്കാനാണ് ഗവണ്മെന്റ് നിര്ദ്ദേശം. നിലവിലെ അഞ്ച് വര്ഷമെന്നത് പത്ത് വര്ഷമായാണ് ഉയര്ത്തുക. അതേസമയം യുകെ സമ്പദ് വ്യവസ്ഥയ്ക്കും, സമൂഹത്തിനും സംഭാവന നല്കി പോയിന്റ് നേടിയവര്ക്ക് ഇതിന് മുന്പ് തന്നെ സെറ്റില്മെന്റ് നേടാനും അവസരമുണ്ട്. ഇത് സംബന്ധിച്ച വിശദവിവരങ്ങള് പിന്നീട് അറിയിക്കും.
