കാനഡയിലേക്ക് വിസിറ്റിംഗ് വിസയ്ക്ക് അപേക്ഷിക്കുന്ന ഇന്ത്യന് പൗരന്മാര് നേരിടുന്നത് ശരാശരി 99 ദിവസത്തെ പ്രോസസ്സിംഗ് സമയം. ഇമിഗ്രേഷന്, റെഫ്യൂജീസ് ആന്ഡ് സിറ്റിസണ്ഷിപ്പ് കാനഡയുടെ ഡാറ്റ അടിസ്ഥാനമാക്കി ഒന്റാറിയോ ആസ്ഥാനമായുള്ള വാര്ത്താ വെബ്സൈറ്റായ 'ഇമിഗ്രേഷന് ന്യൂസ് കാനഡ' ആണ് ഈ റിപ്പോര്ട്ട് പുറത്ത് വിട്ടത്. ഇതുപ്രകാരം, പ്രധാന അപേക്ഷാ രാജ്യങ്ങളില് വെച്ച് ഏറ്റവും കൂടുതല് കാലതാമസം ഇന്ത്യക്കാര്ക്കുള്ള വിസയിലാണ്. കനേഡിയന് പൗരന്മാരുടെയും സ്ഥിര താമസക്കാരുടെയും മാതാപിതാക്കള്ക്കും മുത്തശ്ശീമുത്തശ്ശന്മാര്ക്കും വേണ്ടിയുള്ള സൂപ്പര് വിസയ്ക്ക് അപേക്ഷിക്കുന്നവര് ശരാശരി 169 ദിവസത്തെ കാലതാമസമാണ് നേരിടുന്നത്.
കാനഡയ്ക്ക് പുറത്തുനിന്ന് സമര്പ്പിച്ച വിസിറ്റിംഗ് വിസ അപേക്ഷകളില് ഇന്ത്യയില് നിന്നുള്ള അപേക്ഷകര് ഇപ്പോള് 99 ദിവസത്തെ പ്രോസസ്സിംഗ് സമയമാണ് നേരിടുന്നത്. മുമ്പത്തെ കണക്കെടുപ്പ് കാലയളവിനെ അപേക്ഷിച്ച് 13 ദിവസത്തെ വര്ധനവാണ് ഉണ്ടായിട്ടുള്ളത്. ഇതിന് വിപരീതമായി, മറ്റ് രാജ്യങ്ങളിലെ അപേക്ഷകര്ക്ക് വളരെ കുറഞ്ഞ സമയമാണ് ആവശ്യമായി വരുന്നത്. ഉദാഹരണത്തിന്, യുഎസില് നിന്നുള്ള അപേക്ഷകര്ക്ക് ശരാശരി 36 ദിവസവും, നൈജീരിയയ്ക്ക് 27 ദിവസവും, പാകിസ്ഥാന് 59 ദിവസവും, ഫിലിപ്പീന്സിന് 21 ദിവസവുമാണ് പ്രോസസ്സിംഗ് സമയം.
കനേഡിയന് പൗരന്മാരുടെയും സ്ഥിര താമസക്കാരുടെയും മാതാപിതാക്കള്ക്കും മുത്തശ്ശീമുത്തശ്ശന്മാര്ക്കും വേണ്ടിയുള്ള പ്രത്യേക തരം കനേഡിയന് വിസയായ സൂപ്പര് വിസയ്ക്ക് അപേക്ഷിക്കുന്ന ഇന്ത്യക്കാര്ക്ക് സാധാരണയായി 169 ദിവസമാണ് പ്രോസസ്സിംഗിന് എടുക്കുന്നത്. ഉയര്ന്ന അളവിലുള്ള അപേക്ഷകള്, രാജ്യം തിരിച്ചുള്ള സ്ക്രീനിംഗ്/പശ്ചാത്തല പരിശോധനകള്, വിഭവങ്ങളുടെ കുറവ്, ഉയര്ന്ന ഡിമാന്ഡുള്ള രാജ്യങ്ങളില് നിന്നുള്ള അപേക്ഷകളുടെ സങ്കീര്ണ്ണത എന്നിവയാണ് ഈ കാലതാമസത്തിന് കാരണമായി നിരീക്ഷകര് ചൂണ്ടിക്കാണിക്കുന്നത്.
സ്റ്റഡി പെര്മിറ്റ് പ്രോസസ്സിംഗ് സമയം ഒരു ആഴ്ച കുറഞ്ഞ് നാലാഴ്ചയായി മെച്ചപ്പെടുത്തിയിട്ടുണ്ട്. വര്ക്ക് പെര്മിറ്റുകള് 10 ആഴ്ചയായി സ്ഥിരമായി തുടരുന്നു. കൂടുതല് വിപുലമായ കുടിയേറ്റ മാര്ഗ്ഗങ്ങള് പരിശോധിക്കുമ്പോള്, 2,90,700-ല് അധികം ആളുകള് പൗരത്വം ലഭിക്കാന് കാത്തിരിക്കുന്നുണ്ടെന്നും, ഇതിന്റെ പ്രോസസ്സിംഗ് സമയം 13 മാസമായി മാറ്റമില്ലാതെ തുടരുന്നുവെന്നും റിപ്പോര്ട്ട് പറയുന്നു.
കാനഡയുടെ ഇമിഗ്രേഷന് വിഭാഗം പുറത്തുവിട്ട കണക്കുകള് പ്രകാരം, കഴിഞ്ഞ ഓഗസ്റ്റില് ഏകദേശം 74 ശതമാനം ഇന്ത്യന് അപേക്ഷകര്ക്കും സ്റ്റഡി പെര്മിറ്റ് നിഷേധിച്ചു. ഇത് 2023 ഓഗസ്റ്റിലെ 32 ശതമാനം നിരാകരണ നിരക്കിനേക്കാള് വളരെ കൂടുതലാണ്. അതേസമയം, എല്ലാ രാജ്യങ്ങളിലെയും മൊത്തത്തിലുള്ള നിരാകരണ നിരക്ക് രണ്ട് വര്ഷങ്ങളിലും ഏകദേശം 40 ശതമാനം ആയിരുന്നു. എന്നാല് ചൈനീസ് അപേക്ഷകരില് ഈ വര്ഷം ഓഗസ്റ്റില് 24 ശതമാനം പേര് മാത്രമാണ് നിരാകരിക്കപ്പെട്ടത്.
