അടുത്തയാഴ്ച തുടക്കത്തോടെ യുകെയിലെ വിവിധ ഭാഗങ്ങളില് മഴയും വെള്ളപ്പൊക്കവും ഉണ്ടാകാനിടയുണ്ടെന്നു മുന്നറിയിപ്പുകള്. മിക്ക ഭാഗങ്ങളിലും മഞ്ഞ മുന്നറിയിപ്പാണ് പുറപ്പെടുവിച്ചിരിക്കുന്നത്. തെക്ക് പടിഞ്ഞാറന് ഇംഗ്ലണ്ടിലും വെയ്ല്സിലും അര്ധരാത്രി മുതല് തിങ്കളാഴ്ച വൈകിട്ട് മൂന്നു മണിവരെ കനത്ത മഴയും വെള്ളപ്പൊക്കവും കാരണം പലയിടങ്ങളിലും ഗതാഗത തടസമുണ്ടാകുമെന്ന് മുന്നറിയിപ്പില് പറയുന്നു. അതേസമയം തിങ്കളാഴ്ച രാത്രി എട്ടു മണി മുതല് ചൊവാഴ്ച രാവിലെ ആറു മണി വരെ തെക്ക് കിഴക്കന് ഇംഗ്ലണ്ടില് സമാനമായ സാഹചര്യം ഉണ്ടാകുമെന്നും മുന്നറിയിപ്പിലുണ്ട്.
തെക്ക് പടിഞ്ഞാറന് ഇംഗ്ലണ്ടിന്റെയും തെക്കന് വെയ്ല്സിന്റെയും പല ഭാഗങ്ങളിലും തിങ്കളാഴ്ച 80 മി. മീ വരെ മഴയാണ് പ്രതീക്ഷിക്കുന്നത്. അതേസമയം, വടക്ക്, തെക്ക് ഇംഗ്ലണ്ടുകളില് 60 മുതല് 60 മി. മീ വരെ മഴയുണ്ടാകും. കൊടുങ്കാറ്റിനോളം ശക്തി പ്രാപിച്ചേക്കാവുന്ന തരത്തിലുള്ള അതിശക്തമായ കാറ്റും അനുഭവപ്പെടും. തീരപ്രദേശങ്ങളിലായിരിക്കും ഇത് പ്രധാനമായും അനുഭവപ്പെടുക.
ചൊവ്വാഴ്ച രാവിലെയും കനത്ത മഴ തുടരും. മഴയ്ക്ക് കാരണമാകുന്ന ന്യൂനമര്ദ്ധത്തിന്റെ സഞ്ചാരപഥം ഇനിയും വ്യക്തമായിട്ടില്ലെങ്കിലും മഴയും ഒപ്പമെത്തുന്ന ശക്തമായ കാറ്റും രാജ്യത്തിന്റെ വിവിധ ഭാഗങ്ങളില് റെയില് - റോഡ് ഗതാഗതം തടസപ്പെടുത്തും എന്നത് ഉറപ്പാണെന്ന് കാലാവസ്ഥാ വിദഗ്ധര് പറയുന്നു.
