ശബരിമല സ്വര്ണക്കൊള്ള; മുന് ദേവസ്വം മന്ത്രി കടകംപള്ളി സുരേന്ദ്രനെ രഹസ്യമായി ചോദ്യം ചെയ്തു
തിരുവനന്തപുരം: ശബരിമല സ്വര്ണക്കൊള്ളയുമായി ബന്ധപ്പെട്ട് മുന് ദേവസ്വം മന്ത്രി കടകം പള്ളി സുരേന്ദ്രനെ പ്രത്യേക അന്വേഷണ സംഘം ചോദ്യം ചെയ്തു. ശനിയാഴ്ചയായിരുന്നു ചോദ്യം ചെയ്യല്. ദേവസ്വം ബോര്ഡ് മുന് പ്രസിഡന്റ് പി.എസ് പ്രശാന്തിനെയും ചോദ്യം ചെയ്തിട്ടുണ്ട്. വിവരം രഹസ്യമാക്കി വയ്ക്കുകയായിരുന്നു. തദ്ദേശ തെരഞ്ഞെടുപ്പ് കഴിയുന്നതുവരെ കടകം പള്ളി സുരേന്ദ്രന്റെ ചോദ്യം ചെയ്യല് നീട്ടിവയ്ക്കുകയായിരുന്നു.
അറസ്റ്റിലായ മുന് ദേവസ്വം ബോര്ഡ് പ്രസിഡന്റ് എ.പത്മകുമാറിന്റെ മൊഴിയുടെ അടിസ്ഥാനത്തിലാണ് ചോദ്യം ചെയ്യലെന്നാണ് സൂചന. സ്വര്ണപ്പാളികള്ക്കായി ഉണ്ണികൃഷ്ണന്പോറ്റി അപേക്ഷ നല്കിയത് സര്ക്കാരിനാണെന്നും അതിന്റെ അടിസ്ഥാനത്തിലാണ് ഫയല് ദേവസ്വം ബോര്ഡിന്റെ മുന്നിലെത്തിയതെന്നുമാണ് പത്മകുമാറിന്റെ മൊഴി.
പോറ്റിക്ക് ദേവസ്വം മന്ത്രിയുമായി പരിചയം ഉണ്ടായിരുന്നെന്നും അന്വേഷണസംഘത്തിനു വിവരം ലഭിച്ചിരുന്നു. പോറ്റിയുടെ കൊള്ളയെക്കുറിച്ച് അറിവുണ്ടായിരുന്നോ, അതോ മന്ത്രിയുടെ മുന്നിലെത്തിയ നിവേദനം ബോര്ഡിനു കൈമാറുക മാത്രമായിരുന്നോ എന്നീ കാര്യങ്ങള് പരിശോധിക്കുകയാണ് എസ് ഐ ടിയുടെ ലക്ഷ്യം.
ദേവസ്വം ബോര്ഡിന്റെ ഒരു തീരുമാനത്തിലും മന്ത്രിക്കോ വകുപ്പിനോ പങ്കില്ലെന്നാണ് നേരത്തേ കടകംപള്ളി മാധ്യമങ്ങളോട് പറഞ്ഞത്. ദേവസ്വം ബോര്ഡുമായി ബന്ധപ്പെട്ട ഒരു ഫയലും തന്റെ മുന്നി ല് എത്തിയിട്ടില്ല. ബോര്ഡിന്റെ തീരുമാനങ്ങള് ബോര്ഡിന്റേതു മാത്രമാണ്. പാളികള് ഇളക്കാന് പറയാനും പൂശാന് പറയാനും മന്ത്രിക്ക് അധികാരമില്ലെന്നും കടകംപള്ളി പറഞ്ഞിരുന്നു.
