തിരുവനന്തപുരം: ശബരിമല സ്വര്‍ണക്കൊള്ള കേസില്‍ നടന്‍ ജയറാമിനെ പ്രത്യേക അന്വേഷണ സംഘം (എസ്ഐടി) ചോദ്യം ചെയ്തു. ചെന്നൈയിലെ വീട്ടിലാണ് ചോദ്യം ചെയ്യല്‍ നടന്നത്.
ശബരിമലയില്‍ വെച്ചാണ് ഉണ്ണികൃഷ്ണന്‍ പോറ്റിയെ പരിചയപ്പെട്ടതെന്നും, നിരവധി തവണ പൂജകള്‍ക്കായി പോറ്റി വീട്ടിലെത്തിയിട്ടുണ്ടെന്നും ജയറാം പറഞ്ഞു.
പോറ്റിയുടെ സാമ്പത്തിക ഇടപാടുകളോ തട്ടിപ്പുകളോ സംബന്ധിച്ച് അറിയില്ലെന്നും, താനൊരു കടുത്ത അയ്യപ്പ ഭക്തനാണെന്നും ജയറാം വ്യക്തമാക്കി.
എല്ലാ വര്‍ഷവും ശബരിമലയില്‍ പോകാറുണ്ടെന്നും, അവിടെ വെച്ചാണ് പോറ്റിയുമായി ബന്ധം തുടങ്ങിയത് എന്നും വ്യക്തമാക്കി .
ശബരിമലയിലെ പാളികള്‍ ജയറാമിന്റെ വീട്ടില്‍ വെച്ച് പൂജ നടത്തുന്നതിന്റെ ദൃശ്യങ്ങള്‍ നേരത്തെ പുറത്തുവന്നിരുന്നു. അവയില്‍ പോറ്റിക്കൊപ്പം ജയറാം നില്‍ക്കുന്നതും കാണാം.
ചെന്നൈയിലെ സ്മാര്‍ട്ട് ക്രിയേഷന്‍സ് സ്ഥാപനത്തില്‍ പോറ്റി ക്ഷണിച്ചതനുസരിച്ച് പൂജയില്‍ പങ്കെടുത്തു എന്നും കോട്ടയം ഇളപ്പള്ളി ക്ഷേത്രത്തില്‍ പാളികളെത്തിച്ച് നടത്തിയ ഘോഷയാത്രയിലും പങ്കെടുത്തിരുന്നു എന്നും ജയറാം പറഞ്ഞു .
പൂജാ വിശ്വാസത്തിന് അപ്പുറം പോറ്റിയുമായി മറ്റൊരു ബന്ധവുമില്ല എന്നും . സാമ്പത്തിക ഇടപാടുകളെപ്പറ്റി അറിവില്ല എന്നും ഒരു പണമിടപാടും നടത്തിയിട്ടില്ല എന്നുമാണ് ജയറാമിന്റെ മൊഴി.
